नवी दिल्ली JPN NEWS - नागरिकांच्या नावावर त्यांच्या परवानगीशिवाय SIM कार्ड सक्रिय करणे, दूरसंचार ओळख क्रमांकांचा गैरवापर करणे किंवा मोबाइलचा IMEI क्रमांक बदलणे अथवा छेडछाड करणे याबाबत दूरसंचार विभागाने (DoT) नागरिकांना सावध केले आहे. अशा प्रकारच्या गैरप्रकारांसाठी तीन वर्षांपर्यंत कारावास आणि ५० लाख रुपयांपर्यंत दंड होऊ शकतो, असे विभागाने स्पष्ट केले आहे.
दूरसंचार विभागाच्या मध्य प्रदेश LSAने केलेल्या कारवाईत छत्तीसगडमधील एका Point of Sale (PoS) एजंटने नागरिकांच्या ओळखपत्रांचा त्यांच्या माहितीशिवाय वापर करून २५ मोबाइल कनेक्शन सक्रिय केल्याचे समोर आले. त्यानंतर संबंधित PoSला दूरसंचार सेवा प्रदात्यांकडून ब्लॅकलिस्ट करण्यात आले. या २५ क्रमांकांची Digital Intelligence Platform (DIP)वर तपासणी करून संशयास्पद क्रमांकांची पुन्हा पडताळणी करण्यात आली. पडताळणीत अपयशी ठरलेले क्रमांक बंद करण्यात आले.
SIM दुसऱ्याला देणेही ठरू शकते धोकादायक -
दूरसंचार विभागाने नागरिकांना त्यांच्या नावावर जारी केलेले SIM कार्ड इतर व्यक्तीला देऊ नये, असे आवाहन केले आहे. आपल्या नावावर घेतलेले SIM कार्ड दुसऱ्याने सायबर फसवणूक किंवा अन्य बेकायदेशीर कामासाठी वापरल्यास मूळ ग्राहकावरही कायदेशीर जबाबदारी येऊ शकते.
फसव्या कागदपत्रांच्या आधारे SIM घेणे, बनावट ओळख वापरणे, आपल्या नावावरील SIM भाड्याने किंवा वापरासाठी दुसऱ्याला देणे तसेच SIM Box, मोडेम किंवा अन्य उपकरणांमध्ये छेडछाड केलेला IMEI वापरणे टाळावे, असे विभागाने स्पष्ट केले आहे.
तुमच्या नावावर किती SIM आहेत? एका क्लिकवर तपासा -
नागरिकांनी Sanchar Saathi पोर्टल किंवा मोबाइल ॲपच्या माध्यमातून त्यांच्या नावावर किती मोबाइल कनेक्शन जारी आहेत, याची नियमित तपासणी करावी, असे आवाहन DoTने केले आहे. आपल्या नावावर असलेला अनावश्यक किंवा आपला नसलेला मोबाइल क्रमांक आढळल्यास तो ब्लॉक करण्याची सुविधाही उपलब्ध आहे.
मोबाइलच्या IMEI क्रमांकाची सत्यता तपासण्यासाठीही Sanchar Saathiवर ‘Check Genuineness of Your Mobile Handset’ सुविधा उपलब्ध आहे. यामध्ये मोबाइलचा ब्रँड, मॉडेल आणि उत्पादकाची माहिती तपासता येते. दूरसंचार विभागाने नागरिकांना दूरसंचार साधनांचा गैरवापर टाळण्याचे आणि आपल्या नावावर असलेल्या मोबाइल कनेक्शनची नियमित पडताळणी करण्याचे आवाहन केले आहे.
No comments:
Post a Comment