अफवांमागे पाकचा हात - केंद्रीय गृहसचिव

'ईशान्येच्या राज्यांतील नागरिकांनी आपापल्या मूळ घरी जावे अन्यथा त्यांच्या जीवाला धोका आहे', 'ईदनंतर ईशान्येच्या लोकांना धोका'; अशा स्वरुपाचे एसएमएस आणि एमएमएस पसरवण्यामागे पाकिस्तानचा हात असल्याचे ठोस पुरावे मिळाले आहेत. केंद्रीय गृहसचिव आर. के. सिंह यांनी पत्रकार परिषद घेऊन ही माहिती दिली. बनावट प्रचार रोखण्यासाठी १५ दिवस बल्क एसएमएस आणि एमएमएस तसेच विशिष्ट वेबसाइटवर बंदी घालण्यासारखे उपाय करण्यात येत असल्याचेही सिंह यांनी सांगितले. 
    इराक , इजिप्त , चीन या देशांमध्ये घडलेल्या घटनांचे फोटो आणि व्हिडिओ , ' भारत आणिम्यानमारमधील दंगलीचा फटका बसलेले नागरिक ' असा चुकीचा संदर्भ देऊन सोशल नेटवर्किंगवेबसाइट , एसएमएस आणि एमएमएस आदीच्या माध्यमातून पसरवण्याचे काम पाकिस्तानी सायबरतज्ज्ञ करत आहेत . या पाकिस्तानी कृत्याचा निषेध करुन तो तातडीने थांबवण्यात यावा , यासाठीपाकवर दबाव टाकणार असल्याचेही गृहसचिव सिंह म्हणाले . 
    आतापर्यंत चुकीची माहिती देऊन नागरिकांमध्ये असुरक्षिततेचे वातावरण निर्माण करणा-या ७४ वेबसाइटवर बंदी घालण्यात आली आहे. आणखी ३४ वेबसाइटवर लवकरच बंदी लागू होणार असल्याचेही गृहसचिवांनी सांगितले. आम्ही केलेले आरोप पाकिस्तानकडून फेटाळले जाण्याची शक्यता जास्त आहे. त्यामुळे आरोप सिद्ध करण्यासाठी आमचे तज्ज्ञ तयार आहेत, असेही गृहसचिव म्हणाले. मुंबई, लखनऊ आणि अलाहाबादमध्ये दंगल होण्यामागचे सर्वात मोठे कारण पाकिस्तानने केलेला बनावट प्रचार असल्याचेही गृहसचिवांनी सांगितले.