पोलिस कोठडीची मुदत वाढवली

सीएसटी दंगल प्रकरणी
पोलिस कोठडीची मुदत वाढवली

सीएसटी परिसरातील दंगल प्रकरणी अटक करण्यात आलेल्या २३ आरोपींची पोलिस कोठडी २४ ऑगस्टपर्यंत वाढवली आहे. मोर्चानंतर उसळलेल्या दंगली भडकवण्यामागील हेतू शोधून काढण्याचा पोलिसांचा प्रयत्न सुरू आहे. त्याशिवाय पोलिसांचे एक पिस्तुल व पन्नास गोळ्या अजूनही सापडलेल्या नाहीत. त्यामुळे अधिक चौकशीसाठी आरोपींची गरज असल्याचे रविवारी पोलिसांनी कोर्टाच्या निदर्शनास आणल्यानंर या आरोपींची पोलिस कोठडी वाढवण्यात आली. 
   आसाम व मान्यमारमधील दंगलीच्या निषेधार्थ मुस्लीम संघटनांनी आझाद मैदानावर ११ ऑगस्ट रोजी मोर्चा काढला होता. यावेळी हिंसक झालेल्या आंदोलकांनी जाळपोळ, दगडफेक केली. जमावाला आटोक्यात आणण्यासाठी पोलिसांनी केलेल्या गोळीबारात २जण ठार तर ४४ पोलिसांसह ५२ लोक जखमी झाले होते. या प्रकरणी पोलिसांनी २३ जणांना अटक केली होती. या आरोपींची पोलिस कोठडीची मुदत संपली होती. पण पोलिसांनी अधिक चौकशीसाठी आरोपींची गरज असल्याने कोर्टाच्या निदर्शनास आणले. त्यावर कोर्टाने आरोपीच्या पोलिस कोठडीची मुदत वाढवली.