अल्पसंख्याक समाजातील शिष्यवृत्ती योजनेची मुदत वाढवण्याची मागणी

अल्पसंख्याक समाजातील शिष्यवृत्ती योजनेची मुदत वाढवण्याची मागणी  मुंबई : तांत्रिक कारणांमुळे अनेक अल्पसंख्याक विद्यार्थ्यांना मॅट्रिकपूर्व शिष्यवृत्ती योजनेचा लाभ घेता आलेला नाही. त्यामुळे या योजनेची मुदत 15 दिवसांनी वाढवून द्यावी, अशी मागणी बृहन्मुंबई माध्यमिक आणि उच्च माध्यमिक शाळा मुख्याध्यापक संघटनेतर्फे करण्यात आल्याची माहिती संघटनेचे सचिव प्रशांत रेडीज यांनी दिली.याबाबतचे एक पत्रच महाराष्ट्र राज्याचे शिक्षण संचालक श्रीधर साळुंखे यांना पाठवण्यात आल्याचे रेडीज यांनी सांगितले. यात म्हटल्याप्रमाणे आपल्या अधिपत्याखालील आस्थापनांकडून केंद्र शासनाने जाहीर केल्याप्रमाणे मॅट्रिकपूर्व शिष्यवृत्ती देण्यासाठी अर्ज संपूर्ण राज्यातून मागवण्यात आले होते. प्रत्येक शाळेने ते काटेकोरपणे न भरल्यास मुख्याध्यापक आणि शाळांवर कारवाई करण्याच्या सूचना शिक्षण विभागातून विशेष सभा घेऊन देण्यात आल्या. दरम्यान, गेल्या वर्षीपर्यंत सर्व शाळा छापील अर्जाद्वारे या योजनेचा लाभ घेत होत्या. यंदापासून अर्ज ऑनलाइन पद्धतीने स्वीकारले गेले. 25 ऑगस्टपासून पुन्हा ती सुरूझाली; परंतु तेव्हाही सर्व्हर जाम असल्याने मुख्याध्यापक आणि लिपिक वर्ग हैराण झाला. या बाबी लक्षात घेऊन जर या योजनेचा लाभ सर्वानी घ्यावा, अशी अपेक्षा असेल तर याची मुदत आणखी 15 दिवसांनी वाढवून ती 31 ऑगस्टपर्यंत करावी, अशी मागणी करण्यात आली आहे.