मोबाईल पेमेंटला आरबीआयचा नकार

मोबाईल पेमेंटला आरबीआयचा नकार  मुंबई : भारतीय रिझर्व्ह बँकेने बुधवारी मोबाईल फोनच्या माध्यमातून रोख पेमेंट करण्याची सेवा सुरू करण्याचा मोबाईल कंपन्यांचा प्रस्ताव नामंजूर केला. जोपर्यंत या कंपन्या आपल्या या पेमेंट पद्धतीस बँकांच्या व्यावसायिक प्रतिनिधीचे रूप देत नाहीत तोपर्यंत या कंपन्यांना मोबाईल पेमेंट सेवा सुरू करण्यास मंजुरी दिली जाणार नाही, असे कारण आरबीआयने प्रस्ताव फेटाळताना दिले आहे.  फिक्की-आयबीआय बँकिंग शिखर संमेलनादरम्यान बोलताना आरबीआयचे डेप्युटी गव्हर्नर एच. आर. खान यांनी ही माहिती दिली आहे. आरबीआय मोबाईल नेटवर्क ऑपरेटरना रोख पेमेंट करण्याची सेवा देऊ शकत नाही. बँकिंग नियमांकडे दुर्लक्ष होता नये, असे आमचे स्पष्ट मत आहे; पण या कंपन्या बँकांचे व्यावसायिक प्रतिनिधी म्हणून कार्य करण्यास तयार असतील तर मात्र मोबाईल ऑपरेटरना मोबाईल फोनच्या माध्यमातून रोख पेमेंट करण्याची परवानगी देण्यात येईल, असे खान म्हणाले.