महिलांसाठी मोफत स्वच्छतागृहे असावीत

महिलांसाठी मोफत स्वच्छतागृहे असावीत मुंबई : महिलांसाठी मोफत, स्वच्छ, सुरक्षित आणि सार्वजनिक स्वच्छतागृहे मुंबईत असावीत यासाठी मुंबईतील 30 सामाजिक संघटनांनी गुरुवारी आझाद मैदानात निदर्शने केली.रेल्वे स्टेशन व इतर ठिकाणी सह्यांची मोहीम राबवल्यानंतर आता तीव्र आंदोलन करून स्वच्छतागृहाचा प्रश्न मार्ग लावण्याकरिता पालिकेला व शासनाला निवेदन देण्यात येत आहे. 50 हजार सह्यांचे निवेदन व अहवाल या संघटनांनी तयार केला आहे, असे कोरोच्या निमंत्रक सुप्रिया सोनार यांनी सांगितले. महिलांसाठी मुंबईत 500 स्वच्छतागृहे आहेत, असे पालिकेने जाहीर केले होते. मात्र महिलांसाठी स्वतंत्र मोफत स्वच्छतागृहे नाहीतच अशी माहिती माहितीच्या अधिकाराखाली समोर आली आहे. याबाबत पालिकेशी पत्रव्यवहार केल्यानंतरही उत्तर मिळाले नाही. 'महिलांना लघुशंकेची सोय मोफत आहे' असे फलक सर्व पे अँण्ड यूज स्वच्छतागृहांमधील दर्शनी भागात लावावेत. स्वच्छतागृहांचे नियोजन करत असताना विकलांग महिलेचा विचार व्हावा. त्याचे व्यवस्थापन महिला संस्थेकडे द्यावे, कचर्‍यांचा डबा व सॅनिटरी पॅडची सोय असावी, प्रत्येक दोन कि. मी. अंतरावर अशी सोय असावी. या व आदी मागण्यांचे पत्र पालिकेला या वेळी देण्यात आले.