पालिका शाळा खाजगीकरण विरोधात भारिपचे आंदोलन

पालिका शाळा खाजगीकरण विरोधात भारिपचे आंदोलन मुंबई : महानगपालिका शाळांचे खाजगीकरण झाले तर गोरगरीब जनतेला शिक्षण मिळणार नाहीच. त्याचबरोबर शिक्षकांनाही अनेक संकटांना सामोरे जात नोकरी गमवावी लागेल. त्यामुळे या शाळांचे खाजगीकरण होऊ नये यासाठी भारिप बहुजन महासंघाच्या वतीने गुरुवारी आझाद मैदान येथे निदर्शने करण्यात आली. या वेळी महासंघाचे मुंबई सरचिटणीस सिद्धार्थ कदम, भाकपाचे मुंबई सचिव प्रकाश रेड्डी, श्याम सोनार आदी पदाधिकारी उपस्थित होते. 26 हजार कोटींचे पालिकेचे बजेट आहे. त्यामानाने शिक्षणावर खर्च होत नाही. प्राथमिक शिक्षण खूप गरजेचे आहे. 1331 शाळांच्या माध्यमातून 4 लाख 20 हजार मुले आज पालिकेच्या शाळेत शिक्षण घेत आहेत. कोठारी कमिशनप्रमाणे शिक्षणाला पालिकेने प्राधान्य दिले पाहिजे. असे असताना त्यांचे खाजगीकरण करणे योग्य नाही, असे रेड्डी म्हणाले.मुलांना पावसाळी गणवेश हिवाळ्यात मिळतो, सहा महिन्यांनंतर पुस्तके, दूध प्यायल्याने विषबाधा, शाळांचे छप्पर गळके, जीव मुठीत घेऊन धोकादायक इमारतीमध्ये ही मुले शिक्षण घेत आहेत. शिक्षणासारख्या पवित्र कार्यातही भ्रष्टाचार करू पाहणार्‍या व त्याचे खाजगीकरण करणार्‍या पालिकेचा डाव आम्ही वेळीच हाणून पाडत आहे. भविष्यात तीव्र आंदोलन करून मुलांना व शिक्षकांना न्याय मिळवून देऊ, असे भारिपचे मुंबई संघटक प्रतीक कांबळे म्हणाले.