घाटकोपरमध्ये घरफोडी

मुंबई : सोनसाखळी चोर्‍यांबरोबरच घरफोडीच्या घटनांनी मुंबई शहरात उच्चंक मोडला आहे. गणेशोत्सवाच्या पूजेला गेलेल्या कुटुंबाच्या घरात दिवसाढवळय़ा घुसून चोरटय़ांनी घरातील 5 लाखांहून अधिक किमतीचा ऐवज चोरून नेला. ही घटना घाटकोपर येथे रविवारी घडली असून पंतनगर पोलीस चोरटय़ांचा शोध घेत आहेत. घाटकोपर (पू.), एफ-1/7 बेस्ट वसाहत या ठिकाणी पांडुरंग बबन जोरी (50) हे आपल्या कुटुंबासह राहतात. रविवारी दुपारी 12 या दरम्यान जोरी कुटुंबीय साकीनाका येथे गणेशपूजेला गेले होते. ते सायंकाळी 4 वाजता परतले असता त्यांच्या घरातील कपाट उघडे व इतर साहित्य विखुरलेले दिसले. गॅलरीचा दरवाजा उघडा दिसला. जोरी यांनी घराची पाहणी केली असता कपाटातील सोन्याचे दागिने व 500 रुपये रोख असा 5 लाख 14 हजारांचा ऐवज चोरून नेल्याचे उघड झाले.