काँग्रेसची बेस्ट समिती सभा तहकुबीची मागणी फेटाळली

मुंबई : पालिकेकडून कर्ज घेताना बेस्ट समितीत व्याजाच्या दराबाबत दिशाभूल करणारी माहिती सादर केल्याचा आरोप करत मंगळवारी काँग्रेस सदस्य रवीराजा यांनी बेस्ट समिती सभा तहकूब करण्याची मागणी केली. मात्र यावर बेस्टचे महाव्यवस्थापक ओ. पी. गुप्ता यांनी योग्य स्पष्टीकरणानंतर बेस्ट अध्यक्ष अशोक पाटील यांनी या सूचनेवर मतदान घेत रवीराजा यांची तहकुबी सूचना फेटाळून लावली. रवीराजा यांनी यापूर्वी पालिकेने घेतलेल्या व्याजापेक्षा कमी व्याजानेही आपण कर्ज घेतल्याचे प्रशासनाकडून सांगितले गेले नाही, यामुळे आमची दिशाभूल झाल्याचा आरोप त्यांनी केला. यावर भाजपा गटनेते दिलीप पटेल यांनी रवीराजांचा मुद्दा खोडत राज्य शासनाने पालिकेला व्याज घेऊ नये, असे निर्देश द्यावेत, असा टोला दिला. सुहास सामंत यांनीही पालिकेने आपले काम केले आता तुमचे शासन काय करणार, असे विचारत रवीराजा यांना धारेवर धरले. यावर महाव्यवस्थापक ओ. पी. गुप्ता यांनी जुलै महिन्यापासून कोणत्याही बँकेकडून बेस्टला कर्ज मिळत नसल्याचे स्पष्ट केले. त्यामुळेच पालिका 12 टक्के व्याजाने कर्ज देण्यास तयार झाल्यावर आपण सहमती दर्शवली, असे गुप्ता यांनी सांगितले. यापूर्वीही वेळोवेळी आपण योग्य माहिती समितीसमोर ठेवली होती, मात्र सोयीपुरतेच ऐकले जाते व तेच मांडले जाते, अशी व्यथा त्यांनी मांडली