अंगणवाडी महिलांचे उपोषण सुरू

मुंबई : दादर ते आझाद मैदान अशी रॅली काढण्यास पोलिसांनी परवानगी नाकारल्यामुळे राज्यभरातून थेट आझाद मैदानात अंगणवाडी महिलांचे आंदोलन होणार आहे. दरम्यान, मंगळवारी 19 महिलांनी उपोषण सुरू केले आहे. महाराष्ट्र राज्य अंगणवाडी कर्मचारी संघाचे सरचिटणीस बृजपाल सिंह यांच्याबरोबर मंगला सराफ, लीला पवार, सरला जी. आर., सुनीता बाबर, राजश्री बोडके, संगीता ठाकरे, मंगला मिस्त्री, आशालता पाटील, आशा गांधी, मीना यशवंते, रश्मी ढगे आदी महिलांनी उपोषण सुरू केले आहे. राज्यभरातून 15 ते 20 हजार महिला बुधवारच्या आंदोलनात सहभागी होणार आहेत, असे बृजपाल सिंह यांनी सांगितले. महागाई भत्ता, बोनस, भाऊबीज भेट, शासकीय सेवेत कायम करणे, वार्षिक वेतनवाढ, ग्राम बालविकास योजनेतील कामासाठी ताशी 35 रुपये द्यावे, 1 तारखेला मानधन मिळावे, गणवेषाचा प्रश्न, रजा, निवृत्ती लाभ, आरोग्याचा प्रश्न, आजारपणाची रजा, एक महिन्यांची उन्हाळी सुट्टी, सुसज्ज अंगणवाडी, टीएचआर आदी मागण्यांबाबत सरकारने निर्णय घ्यावा, असे सिंह यांनी या वेळी सांगितले.