बाळासाहेबांच्या खोलीत 'नो एन्ट्री'

शिवसेनाप्रमुख बाळासाहेब ठाकरे यांच्या तब्येतीविषयी जाणून घेण्यासाठी, त्यांची विचारपूस करण्यासाठी ' मातोश्री ' वर विविध क्षेत्रातील मान्यवरांची रीघ लागली असली, तरी त्यांच्यापैकी कुणालाच बाळासाहेबांना प्रत्यक्ष पाहता येत नाहीए. मातोश्री बंगल्यातील दुस-या मजल्यावर बाळासाहेबांवर उपचार सुरू असून तिथे फक्त ठाकरे कुटुंबीयांनाच प्रवेश दिला जातोय.

बाळासाहेबांची तब्येत खालावल्यानंतर शिवसेना नेत्यांसह राजकारण, समाजकारण, उद्योग, कला, चित्रपट क्षेत्रातील अनेक बड्या व्यक्तींनी ' मातोश्री ' ला भेट दिली. मात्र त्यांच्यापैकी कुणालाच बाळासाहेबांपर्यंत पोहोचता आलं नसल्याचं अधिकृत सूत्रांकडून समजतं. राज्यपाल के. शंकरनारायण, केंद्रीय कृषिमंत्री शरद पवार यांनाच फक्त त्यांच्या खोलीत प्रवेश देण्यात आला होता. त्यांच्याशिवाय, अन्य दिग्गज नेतेमंडळींनी तळमजल्यावरच उद्धव ठाकरे, रश्मी ठाकरे, राज यांच्याकडून बाळासाहेबांच्या तब्येतीविषयी जाणून घेतलं.

ठाकरे कुटुंबीयांशिवाय कुणालाही वरच्या मजल्यावर, बाळासाहेबांच्या खोलीत पाठवण्यास डॉक्टरांनीच मज्जाव केला आहे. बाळासाहेबांना कुठलंही इन्फेक्शन होऊ नये, यादृष्टीनं डॉक्टरांनी ही खबरदारी घेतली आहे. त्यामुळे उद्धव, राज, आदित्य यांची ठरावीक काळानं वर-खाली ये-जा सुरू आहे. शिवसेना नेते, पदाधिका-यांसह काही मनसैनिकही ' मातोश्री ' च्या तळमजल्यावर तळ ठोकून
आहेत. आपल्या नेत्याकडून ते बाळासाहेबांच्या तब्येतीबाबत वेळोवेळी माहिती घेत आहेत.