इंदू मिल मधील डॉ. आंबेडकर स्मारकाचा आराखडा सरकारला सादर

३६० फुटाचा डॉ. आंबेडकर यांचा पुतळा

बाबासाहेबांचे स्मारक दादरकरांसाठी ऑक्सिजनचे बेट

मुंबई/अजेयकुमार जाधव (http://jpnnews.webs.com) 

डॉ. बाबासाहेब आंबेडकर यांचे इंदू मिलवर स्मारक कसे असावे याबाबत वास्तुरचनाकार सौरभ चटर्जी यांनी तयार केलेला या स्मारकाचा भव्य आराखडा रिपब्लिकन सेनेचे अध्यक्ष आनंदराज आंबेडकर यांनी राज्य सरकारला सादर केला आहे. इंदू मिलची जागा बारा एकर आहे. यातील केवळ 9 टक्के क्षेत्रावर बांधकाम असून उर्वरित जागेवर हिरवळ निर्माण केली जाणार असल्याने इंदू मिलच्या जागेवरील बाबासाहेबांचे स्मारक दादरकरांसाठी ऑक्सिजनचे बेट ठरणार आहे.

आराखड्यानुसार, या ठिकाणी त्यांचा ३६० फुटी भव्य डॉ. आंबेडकर यांचा पुतळा, एक लाख लोकांना सामावून घेईल अशी या नियोजित स्मारकाची रचना असून चार हजार वाहनांच्या पार्किंगची सोय, साढेचार हजार चौरस फुटांची लायब्ररी, ध्यान केंद्र, भव्य वाचनालय यामध्ये असून छोट्या पाच सभागृहांचा यात अंतर्भाव आहे. 10 हजार लोकांच्या भोजनाची येथे व्यवस्था होईल असा खुला मंडप असून, भिक्खू आणि महत्त्वाच्या व्यक्तींना राहण्यासाठी येथे अनेक कक्षांची सोय आहे. बुद्धा पार्क नावाचे मेडिटेशन सेंटर, आकर्षक अँम्पी थिएटर आकर्षणाचा भाग असणार आहे

स्मारकाची मुख्य इमारत पाच मजली आहे. ही इमारत समतेचा संदेश देणार्‍या 'लोटस' सूत्राच्या डिझाईनचे एक कन्व्हेंशन सेंटर असणार आहे. ज्याचा घुमट दिवसा सूर्यप्रकाशाने उजळून निघेल, मात्र रात्री तांबडय़ा दिव्यांमुळे सोन्यासारखा दिसणार आहे. एकूण बारा एकर पैकी केवळ ९ टक्के जागेवरच बांधकाम असून ९१ टक्के मोकळी ठेवण्यात येणार आहे. या मोकळ्या जागेवर ६ डिसेंबर महापारीनिर्वान दिनी व १४ एप्रिल रोजी आंबेडकर जयंती दिनी येणाऱ्या आंबेडकरी अनुयायांच्या राहण्याची सोय करणार केली जाणार आहे.  

राज्य शासनाने इंदू मिलची जागा केंद्र सरकारकडे कडे मागणी केली तेव्हा बारा एकर जागेवर काय करणार असा प्रश्न उपस्थित करत स्मारकचा आराखडा सादर करण्यास सांगण्यात आले होते. सरकारी पातळीवर विलंब झाला असता म्हणून आम्हीच आराखडा बनवून राज्य शासनाला सादर केल्याचे आनंदराज यांनी सांगितले. मुख्यमंत्री पृथ्वीराज चव्हाण यांनी हा आराखडा आपल्याकडे ठेवून घेतला असून या मध्ये पुढे बदलही होऊ शकतो असे आनंदराज यांनी सांगितले.

 ‘स्टॅच्यू ऑफ इक्वॅलिटी’ 

समुद्रात अमेरिकेने उभारलेला स्वातंत्र्यदेवतेचा पुतळा 300 फूट उंच आहे. तो जगातला सर्वाधिक उंच पुतळा असून त्यास ‘स्टॅच्यू ऑफ लिबर्टी’ म्हणून ओळखले जाते. इंदू मिलच्या स्मारकातील बाबासाहेबांचा 360 फुटाचा पुतळा ‘स्टॅच्यू ऑफ इक्वॅलिटी’ म्हणून ओळखला जाईल, असे आनंदराज यांनी सांगितले.