डॉ. आंबेडकर यांच्या स्मारकासाठी मुख्यमंत्री व उपमुख्यमंत्री दिल्लीत

येत्या ६ डिसेंबरला डॉ. बाबासाहेब आंबेडकर यांच्या महापरिनिर्वाणदिनाच्या दिवसापर्यंत इंदू मिलच्या जागेवर डॉ. आंबेडकर यांच्या स्मारकाच्या उभारणीस सुरुवात न झाल्यास आंदोलन करण्याचा इशारा रिपब्लिकन नेते रामदास आठवले यांनी दिला आहे. महापरिनिर्वाण दिनी चैत्यभूमीवर येणार्‍या लाखो भाविकांच्या साक्षीने आंदोलन सुरू झाल्यास निवडणुकीच्या दृष्टीने ते योग्य ठरणार नाही. गेल्या ६ डिसेंबरला इंदू मिलची जागा या स्मारकाला देण्याची घोषणा केंद्र सरकारने केली. मात्र आजपर्यंत या स्मारकाचा आराखडाही तयार झाला नाही. पर्यावरण तसेच इतर वेगवेगळ्या खात्याच्या परवानग्याही अजून मिळालेल्या नाहीत. केंद्र सरकारकडून होत असलेला हा विलंबही सरकारच्या दृष्टीने चांगला राहणार नाही. त्यामुळे या विषयावर हे दोन्ही नेते पंतप्रधान डॉ. मनमोहन सिंग यांची भेट घेण्याची शक्यता वर्तवली जात आहे. मुख्यमंत्री चव्हाण मंगळवारी नागपूरजवळ सावनेर येथे एका कार्यक्रमासाठी गेले होते. तेथून ते मध्य प्रदेश आणि छत्तीसगड येथे विधानसभा निवडणुकीच्या प्रचारासाठी गेले. तेथूनच ते राजधानी दिल्लीला रवाना झाले. उपमुख्यमंत्री अजित पवार मुंबईतच होते. मंत्रालयात न येता त्यांनी आपल्या निवासस्थानीच बहुतांशी कामकाज केले. त्यानंतर तेथूनच ते दिल्लीला रवाना झाले, असे कळते.