६ डिसेंबर ड्राय डे घोषित करण्यासाठी भीम सेनेचे जेलभरो

मुंबई - प्रतिनिधी - 6 / 12 / 2013 - http://jpnnews.webs.com ( JPN NEWS website)

गेले ५ वर्षे ६ डिसेंबर हा डॉ. बाबासाहेब आंबेडकर यांच्या महापरिनिर्वाण दिनी ड्राय डे घोषित करावा अशी मागणी करूनही सरकार कडून ड्राय डे घोषित केला जात नसल्याच्या निषेधार्थ न्यू आरएनए बुद्ध विहार ते आरसीएफ पोलिस ठाण्यापर्यंत राष्ट्रीय भीम सेना पक्षाच्या वतीने महापरिनिर्वाण दिनी मोर्चा काढून जेलभरो आंदोलन करण्यात आले.

राष्ट्रीय भीम सेनेचे राष्ट्रीय अध्यक्ष आर. आर. पांडियन,वाहतूक सेनेचे महाराष्ट्र अध्यक्ष सचिन  गवार , मुंबई सचिव संजय मेहरोलिया यांच्या नेतृत्वा खाली निघालेल्या मोर्चाला संबोधित करताना गेले अनेक वर्षे आम्ही आंदोलन केले पण सरकार आमच्या मागणीकडे दुर्लक्ष करीत आहे. सर्व महापुरुषांच्या पुण्यतिथीला ड्राय डे घोषित केला जातो परंतू बाबासाहेबांच्या महापरिनिर्वाण दिनी ड्राय डे का घोषित केला जात नाही असा प्रश्न पांडियन यांनी उपस्थित केला. आम्ही आंबेडकरांचे अनुयायी कायदा हातात ने घेता शांततेच्या मार्गाने आंदोलन करतो, मोर्चे काढतो म्हणून सरकार आमच्या मागण्यांकडे दुर्लक्ष करते. तर मनसेच्या स्टाईलने जे आंदोलन करतात त्यांचे प्रश्न सरकार त्वरित सोडवत असल्याने आंबेडकरी जनते मध्ये याबाबत तीव्र असंतोष पसरत असल्याचे पांडियन यांनी सांगितले. बाबासाहेबांच्या पुढील महापरिनिर्वाण दिनापूर्वी सरकारने ६ डिसेंबरला ड्राय डे घोषित केला नाही तर पुढील वर्षी सरकारला जी भाषा कळते त्याच मनसे स्टाईलने आंदोलन करू असा इशारा पांडियन यांनी या वेळी दिला.