एड्स नियंत्रणासाठी पालिका प्रयत्नशील

मुंबई : एड्स नियंत्रणासाठी जागतिक पातळीवर प्रयत्न सुरू असून, भारत देशातही याची जनजागृती मोठय़ा प्रमाणात करण्यात येत आहे. मुंबई महानगरपालिकेने यासाठी स्वतंत्र यंत्रणा उभारली आहे. एड्स नियंत्रणात मुंबई शहर आदर्श शहर ठरवण्यासाठी पालिका प्रशासन प्रयत्नशील असल्याचे प्रतिपादन मुंबईच्या महापौर स्नेहल आंबेकर यांनी केले. महापौर स्नेहल आंबेकर यांना भेटण्यासाठी आफ्रिकेतील अबीदजान कोट-दे-इवार शहराचे महापौर क्लाऊड पॉलीन डान्हो, यूएन एड्सचे महासंचालक मुबाल्हा मुगाबे, यूएन एड्स कार्यकारी संचालक कार्यालयाचे प्रदीप काकतील, यूएन एड्स इंडियाचे प्रदेश संचालक उसामा तवील, कोट-दे-इवार शहराचे संचालक तमसीर सॉल, यूएन एड्स इंडियाच्या डॉ. नवनीत टेवाटिया आदीजण या शिष्टमंडळात उपस्थित होते. या वेळी कोट-दे-इवारचे महापौर क्लाऊड पॉलीन डान्हो यांना महापौर आंबेकर यांनी पालिकेचे बोधचिन्ह व पुष्पगुच्छ देऊन स्वागत केले. मुंबईत सध्या जागतिक स्तरावरील एड्स निर्मूलन संदर्भात परिषद सुरू आहे. या परिषदेच्या माध्यमातून एड्सचे समूळ उच्चाटन करण्यासाठी जागतिक स्तरावर नियोजन करण्यात येत आहे, याची माहिती शिष्टमंडळाने मुंबईच्या महापौरांना दिली. महापौर आंबेकर यांनी जागतिक संस्थेने जी १४ शहरे एड्स निर्मूलनासाठी निवडली आहेत, यात मुंबई शहराचाही समावेश आहे. एड्स निर्मूलनात जागतिक स्तरावर मुंबई शहराचा आदर्श निर्माण करण्यासाठी पालिका प्रयत्नशील असल्याचे प्रतिपादन महापौरांनी केले.