मुंबईमधील पूरपरिस्थितीसदृश विभागांत नागरी संरक्षण दलाची पथके

मुंबई : पावसाळ्यात मुंबईमधील पूरपरिस्थितीसदृश संवेदनशील १२ विभागांमध्ये नागरी संरक्षण दलाच्या एकूण ३00 स्वयंसेवकांच्या तुकड्या तीन पाळ्यांमध्ये तैनात करण्यात येणार आहेत. चार, पाच व सहा जून रोजी समुद्रातील लाटांची उंची साडेचार मीटरची असल्याने या तीनही दिवशी आवश्यकता भासल्यास दलाच्या स्वयंसेवकांची नेमणूक करण्यात येणार आहे. यासाठी पालिका प्रत्येक स्वयंसेवकाला ४00 रुपये असे एकूण एक कोटी ३३ लाख २0 हजार रुपये कर्तव्यभत्ता मोजणार आहे. २६ जुलै २00५ च्या आपत्कालिन परिस्थितीचा अनुभव लक्षात घेऊन, पालिकेने २00६ ते २0१४ पर्यंतच्या पावसाळ्यात नागरी संरक्षण दलाच्या सेवांचा वापर केला आहे. हे दल संवेदनशील अशा १२ विभागांमध्ये तैनात करण्यात येते. यंदाही १५ जून ते ३0 सप्टेंबरपर्यंत एकूण १0८ दिवस ही सेवा उपलब्ध असणार आहे. संरक्षण दलाचे जवान तीन पाळ्यांमध्ये काम करणार आहेत. सकाळी ७ ते दुपारी दोन, दुपारी २ ते रात्री ९ आणि रात्री ९ ते सकाळी ७ या वेळेत ते काम करणार आहेत. पण या दलाच्या सेवेची आवश्यकता न भासल्यास ती ३0 सप्टेंबरपूर्वी पूर्वसूचना देऊन खंडीत करण्यात येणार आहे. प्रत्येक जवानास ३00 रुपये यानुसार ३00 स्वयंसेवकांचा १११ दिवसांचा भत्ता एक कोटी ३३ लाख २0 हजार रुपये आहे. पालिकेच्या आपत्कालिन व्यवस्थापन विभागाचा हा प्रस्ताव येत्या शुक्रवारी होणार्‍या स्थायी समितीच्या बैठकीत औपचारिक संमतीसाठी मांडण्यात येणार आहे. नागरी संरक्षण दल राज्य सरकारच्या अखत्यारीत असल्याने या कामासाठी सार्वजनिक जाहिरातीद्वारे निविदा मागवल्या नाहीत, असे पालिका आयुक्तांनी आपल्या प्रस्तावात स्पष्ट केले आहे.