नराधमांना पकडण्यासाठी मुंबई पोलीस घेणार गृहिणींची मदत

मुंबई : शहरात महिलांवरील अत्याचाराच्या घटनांचे प्रमाण अद्याप कमी न झाल्याने या घटनांना आळा घालण्यासाठी मुंबई पोलीस आता गृहिणींची मदत घेणार आहेत. नराधमांना जाळ्यात पकडण्यासाठी गृहिणींची 'डिटेक्टिव्ह' म्हणून नियुक्ती करण्याचा निर्णय पोलिसांनी घेतला आहे. सध्या प्रायोगिक तत्त्वावर अँण्टॉप हिल आणि वडाळा परिसरात पाच महिलांना गोपनीय माहिती काढण्याचे प्रशिक्षण देण्यात आले आहे. गृहिणींच्या मदतीमुळे अत्याचार-विनयभंगाच्या प्रकरणांतील सराईत गुन्हेगारांना पकडणे सोपे ठरेल, अशी आशा पोलिसांनी बाळगली आहे. मुंबईत दर दिवशी महिलांवरील अत्याचाराच्या किमान दोन-तीन घटना उघडकीस येत आहेत. अशा घटना रोखण्यासाठी पोलिसांनी कठोर पावले उचलली, तरीही नराधमांना जरब न बसल्याने आता गृहिणींची मदत घेण्याचा निर्णय घेण्यात आला आहे. पोलिसांनी प्रायोगिक तत्त्वावर अँण्टॉप हिल आणि वडाळा परिसरात पाच गृहिणींची 'डिटेक्टिव्ह' म्हणून नियुक्ती केली आहे. या परिसरात महिलांवर लैंगिक अत्याचार व विनयभंगाच्या प्रकरणांत मोठय़ा प्रमाणावर वाढ झाली आहे. पोलीस अधिकार्‍यांच्या माहितीनुसार, गेल्या वर्षी अँण्टॉप हिल आणि वडाळा टीटी या दोन पोलीस ठाण्यांत अत्याचाराच्या एकूण ७१ गुन्ह्यांची नोंद झाली. या परिसरातील अल्पवयीन मुलींचे अपहरण करून त्यांच्यावर अत्याचार करण्याचे प्रकार वाढीस लागले आहे. पोलिसांनी नियुक्त केलेल्या पाच 'डिटेक्टिव्ह' गृहिणी अँण्टॉप हिल आणि वडाळ्याच्या वेगवेगळ्या विभागातील आहेत. त्यांना नराधम तसेच ड्रग्जचे सेवन करणार्‍या गुन्हेगारांना ओळखण्याचे धडे देण्यात आले आहेत. सहपोलीस आयुक्त (कायदा व सुव्यवस्था) देवेन भारती यांनी या वृत्ताला दुजोरा देत हा प्रायोगिक प्रकल्प आम्ही सुरू केल्याचे सांगितले. सध्या पाच महिलांना विशेष प्रशिक्षण देण्यात आले असून त्या मुंबई पोलिसांचे 'कान-डोळे' बनून कार्यरत राहणार असल्याचे त्यांनी स्पष्ट केले.