मध्य रेल्वेच्या १७ धोकादायक प्लॅटफॉर्मची उंची वाढवणार

मुंबई : मध्य रेल्वे मार्गावरील १७ धोकादायक प्लॅटफॉर्मची ३१मेपर्यंत उंची वाढवण्यात येणार आहे. ८२0 एमएमपेक्षा कमी उंचीच्या असलेल्या या प्लॅटफॉर्मची मुंबई उच्च न्यायालयाच्या आदेशानुसार, ९00 एमएमपर्यंत उंची वाढवली जाणार आहे. प्रवासी सुरक्षेच्या पार्श्‍वभूमीवर मध्य रेल्वेकडून उच्च न्यायालयाच्या आदेशाची अंमलबजावणी केली जाणार असल्याचे वरिष्ठ सूत्रांनी सांगितले. सायन, कुर्ला, विद्याविहार, विठ्ठलवाडी, उल्हासनगर, भिवपुरी, आटगाव, सँडहस्र्ट रोड आणि वडाळा या रेल्वे स्थानकांवरील प्लॅटफॉर्मची उंची वाढवण्याकडे मध्य रेल्वे प्रशासनाने विशेष लक्ष दिले आहे. प्रशासनाने याआधी १४ स्थानकांवरील २६ प्लॅटफॉर्मची ९00 एमएमपर्यंत उंची वाढवली आहे. यात सँडहस्र्ट रोड, घाटकोपर, विक्रोळी, कांजुरमार्ग, ठाणे, नाहूर, कोपर, कॉटन ग्रीन आणि रे रोड या स्थानकांचा समावेश आहे. तसेच ८२0 एमएम ते ८४0 एमएमपर्यंत उंची असलेल्या ५९ प्लॅटफॉर्मची पुढील वर्षी मेपर्यंत उंची वाढवली जाणार असल्याचे सूत्रांकडून समजते. २0१४ मध्ये प्लॅटफॉर्म आणि लोकलचा फूटबोर्ड यामधील पोकळीत सापडून काही प्रवाशांना प्राण गमवावा लागल्याच्या घटना घडल्यानंतर प्लॅटफॉर्मच्या उंचीचा प्रश्न ऐरणीवर आला. याचदरम्यान मोनिका मोरे या तरुणीला घाटकोपर रेल्वे स्थानकात गाडी पकडताना झालेल्या अपघातात दोन्ही हात गमवावे लागले होते. अशा घटनांची पुनरावृत्ती टाळण्याच्या हेतूने मध्य रेल्वे प्रशासन सध्या उच्च न्यायालयाच्या आदेशाची अंमलबजावणी करू लागले आहे.