बेस्टमधील भरती व बढतीवरील बंदीला सर्वपक्षीय विरोध

मुंबई : बेस्टची आर्थिक स्थिती कमकुवत असल्याचे सांगत बेस्टकडून कर्मचार्‍यांच्या भरती व बढतीबाबत बंदी घालणार्‍या परिपत्रकाला शुक्रवारी बेस्ट कमिटी बैठकीत सर्वपक्षीय विरोध करण्यात आला. हा निर्णय माझ्याशी आणि बेस्ट समिती सदस्यांसोबत चर्चा करून घ्यायला हवा होता, असे सांगत बेस्ट अध्यक्ष अरुण दुधवडकर यांनी निर्णय पुढील बैठकीत घेण्यात येणार असल्याचे स्पष्ट केले.  बेस्ट प्रशासनामध्ये कर्मचार्‍यांची कमतरता असून यापुढे कर्मचार्‍यांची भरती व बढती करण्याला बंदी घालणारे एक परिपत्रक बेस्ट महाव्यवस्थापकांकडून जाहीर करण्यात आले होत.े. या परिपत्रकावर शिवसेना सदस्य सुहास सामंत यांनी हरकत नोंदवल्यानंतर सर्व पक्षांकडून या परिपत्रकाला विरोध करण्यात आला. सध्या बेस्ट चालक, वाहकांसह चतुर्थ श्रेणी कर्मचार्‍यांच्या सुमारे ३ हजार जागा रिक्त आहेत. त्या भरण्याऐवजी भरती बंद करण्याचे परिपत्रक काढण्यात आले. त्यामुळे शुक्रवारी बेस्ट समिती सदस्यांच्या बैठकीय सर्वपक्षीयांनी विरोध केल्यामुळे या परिपत्रकाबाबत पुनर्विचार करण्यात येणार असल्याचे सांगण्यात आले आहे. कर्मचार्‍यांच्या मागण्याचा विचार केला नाही, तर कर्मचारी आंदोलन छेडतील, असा इशाराही सामंत यांनी दिला आहे.