नागरिकांच्या सुविधेसाठी हेल्थ चॅटबॉट महत्वपूर्ण ठरणार

मुंबई - बृहन्मुंबई महानगरपालिकेमार्फत पुरवण्यात येणाऱया सार्वजनिक आरोग्य क्षेत्रातील सुविधांना आता तंत्रज्ञानाचीही जोड उपलब्ध करून देण्यात येत आहे. बृहन्मुंबई महानगरपालिकेने डिजिटल सेवांच्या दिशेने महत्वपूर्ण पाऊल टाकले आहे. नागरिकांच्या आरोग्य सुविधेसाठी ‘हेल्थ चॅटबॉट’ ची सुविधा बृहन्मुंबई महानगरपालिकेने उपलब्ध करून दिली आहे. या डिजिटल सुविधांचे लोकार्पण राज्याचे माहिती तंत्रज्ञान, सांस्कृतिक कार्य मंत्री तथा मुंबई उपनगर जिल्ह्याचे पालकमंत्री आशिष शेलार यांच्या हस्ते करण्यात आले.

बृहन्मुंबई महानगरपालिकेच्या वतीने डिजीटल पुढाकार अंतर्गत नागरिकांना आरोग्य क्षेत्रासाठी चॅटबॉटची सुविधा उपलब्ध करून देण्यात आली आहे. या डिजीटल पुढाकाराच्या माध्यमातून आरोग्य क्षेत्रात पारदर्शकता वाढवतानाच, आरोग्य सुविधांची पोहच आणि कार्यक्षमता वाढवण्यासाठी प्रयत्न करण्यात येत आहे.

सार्वजनिक आरोग्याशी संबंधित माहिती सहजशक्य आणि डिजीटल पद्धतीने उपलब्ध करून देण्याचे निर्देश बृहन्मुंबई महानगरपालिका आयुक्त तथा प्रशासक भूषण गगराणी यांनी दिले होते. डिजीटल पद्धतीने सुविधा उपलब्ध करून दिल्यामुळे नागरिकांना अतिशय पारदर्शकपणे माहिती उपलब्ध होणार आहे. बृहन्मुंबई महानगरपालिकेच्या कामकाजात अधिकाधिक माहिती तंत्रज्ञानाचा उपयोग केला जात आहे. याचा एक भाग म्हणून डिजीटल पद्धतीने ऑनलाईन सुविधा उपलब्ध करून देण्यासह अद्ययावत माहिती उपलब्ध करून देण्यासाठी आरोग्य विभाग अंतर्गत घेतलेला हा पुढाकार नागरिकांसाठी महत्त्वाचा ठरेल. अधिकाधिक तंत्रज्ञानस्नेही पुढाकारांमुळे नागरिकांच्या वेळेची बचत होईल. तसेच आरोग्य क्षेत्रातील आपत्कालीन प्रसंगीचे निर्णय घेण्यासाठी ही सुविधा महत्वाची ठरेल. 

बीएमसी हेल्थ चॅटबॉट (BMC Health Chatbot) - 

नागरिकांना आरोग्याच्यादृष्टीने प्रतिबंधात्मक काळजी घेण्यापासून ते संपूर्ण आरोग्य सेवांची माहिती देण्यासाठी 9892993368 हा चॅटबॉट क्रमांक उपलब्ध करून देण्यात आला आहे. या पुढाकार अंतर्गत आजाराबाबत जनजागृती, आरोग्य क्षेत्रातील मोहीमेची माहिती, नजीकची आरोग्य सुविधा, नोंदणींबाबत माहिती, आरोग्य प्रमाणपत्र तसेच परवान्याबाबतची माहिती, आरोग्य केंद्राच्या ठिकाणी भेटीची ऑनलाईन पद्धतीने नोंदणी इत्यादी सुविधा चॅटबॉटच्या माध्यमातून उपलब्ध होणार आहे. त्यामुळे नागरिकांचा वेळ वाचण्यासाठी मदत होईल. त्यासोबतच आरोग्य यंत्रणेतील कार्यक्षमता वाढीसाठीही मदत होईल.  

नागरी सेवांमध्ये जन्म आणि मृत्यू दाखल्यासाठी अर्ज करण्याबाबतची माहिती, विवाह नोंदणीची माहिती, अपंगत्व प्रमाणपत्र, आरोग्य परवाने तसेच प्रसूतिगृहाशी संबंधित परवाने मिळवण्याच्या प्रक्रियेची माहितीही या चॅटबॉटच्या माध्यमातून मिळणार आहे. 

ऑनलाईन नोंदणी आणि सेवा नोंदणी - 

नागरिकांना आरोग्य केंद्राच्या ठिकाणी ऑनलाईन नोंद करण्यासाठी डिजिटल पद्धतीने नोंद करणे शक्य होणार आहे. नागरिकांची वेळेची बचत ऑनलाईन नोंदणी सुविधेमुळे शक्य होईल. 

राज्यस्तरीय तसेच राष्ट्रीय आरोग्य सेवांसाठीचा पुढाकार - 

राज्य आणि राष्ट्रीय स्थरावरील आरोग्य सुविधा आणि सेवांसाठी महत्वाची माहिती चॅटबॉटच्या माध्यमातून आगामी कालावधीत उपलब्ध होणार आहे. राज्य आणि केंद्र सरकारशी संबंधित विविध आरोग्य योजनांची माहिती याठिकाणी उपलब्ध होईल. 

येत्या कालावधीत बृहन्मुंबई महानगरपालिकेच्या माध्यमातून आरोग्य सुविधांबाबतचे समर्पक असे संकेतस्थळ आणि यपीडी रुग्णशय्या उपलब्धतता डॅशबोर्डही उपलब्ध करून देण्यात येणार आहे. तंत्रज्ञानावर आधारित सेवांमुळे नागरिकांना आरोग्याशी संबंधित माहिती अधिक सुलभपणे मिळण्यासाठी मदत होणार आहे.