मुंबई - समाजात शिक्षणाला प्रोत्साहन देत गरजू विद्यार्थ्यांना भक्कम आधार देण्याच्या उद्देशाने DEVBHOOMI CHARITABLE TRUST यांच्या वतीने मुलुंड (पश्चिम) येथील दीनदयाल उपाध्याय म्युनिसिपल हिंदी स्कूल येथे शैक्षणिक साहित्य वितरण कार्यक्रम उत्साहात पार पडला.
या उपक्रमांतर्गत विद्यार्थ्यांना वह्या, पेन, शालेय साहित्य आदींचे वितरण करण्यात आले. कार्यक्रमास शाळेचे शिक्षकवृंद, विद्यार्थी तसेच ट्रस्टचे पदाधिकारी व सदस्य मोठ्या संख्येने उपस्थित होते. साहित्य मिळाल्याने विद्यार्थ्यांच्या चेहऱ्यावर उमटलेला आनंद आणि उत्साह हा या उपक्रमाचा खरा यशस्वी क्षण ठरला.
हा उपक्रम ट्रस्टच्या प्रमुख सल्लागार तथा मुख्याध्यापिका नलिनी बहादुरसिंह मेहता यांच्या मार्गदर्शनाखाली संपन्न झाला. यावेळी ट्रस्टचे ट्रस्टी दिवानसिंह रामसिंह सौंन, दीपा दिवानसिंह सौंन, दिलवर रावत तसेच सुरेश उपाध्याय यांनी विद्यार्थ्यांना मार्गदर्शन करताना शिक्षणाचे महत्त्व अधोरेखित केले.
“शिक्षण हे जीवन घडविण्याचे आणि स्वप्ने साकार करण्याचे सर्वात प्रभावी माध्यम आहे. आमचा उद्देश केवळ साहित्य वितरण नसून विद्यार्थ्यांचा आत्मविश्वास वाढवून त्यांचे भविष्य अधिक सक्षम करणे हा आहे,” असे त्यांनी सांगितले.
ट्रस्टच्या वतीने शिक्षण, सेवा आणि सामाजिक बांधिलकी यासाठी सातत्याने कार्य करण्याचा निर्धारही व्यक्त करण्यात आला. शाळा प्रशासनाने ट्रस्टचे मनःपूर्वक आभार मानत या उपक्रमाचे कौतुक केले.
कार्यक्रमाचा समारोप विद्यार्थ्यांच्या आनंदी स्मितहास्य आणि सकारात्मक ऊर्जेत झाला, ज्यामुळे त्यांच्या शैक्षणिक प्रवासाला नवी दिशा आणि प्रेरणा मिळाल्याचे चित्र पाहायला मिळाले.
No comments:
Post a Comment