ठाणे-कल्याणदरम्यान रविवारी चार तासांचा मेगा ब्लॉक

मुंबई JPN NEWS - मध्य रेल्वेच्या मुंबई विभागाकडून रविवार, २० सप्टेंबर रोजी ठाणे आणि कल्याण स्थानकांदरम्यान पाचव्या व सहाव्या मार्गिकेवर सकाळी ९ ते दुपारी १ वाजेपर्यंत मेगा ब्लॉक घेण्यात येणार आहे. विविध अभियांत्रिकी आणि देखभालविषयक कामांसाठी हा ब्लॉक घेण्यात येणार असून, त्याचा परिणाम काही मेल आणि एक्स्प्रेस गाड्यांच्या वाहतुकीवर होणार आहे.

ब्लॉकच्या कालावधीत ठाणे-कल्याणदरम्यान डाउन दिशेने धावणाऱ्या 11029 CSMT-कोल्हापूर कोयना एक्स्प्रेस, 11055 LTT-गोरखपूर गोदान एक्स्प्रेस, 11061 LTT-जयनगर एक्स्प्रेस आणि 16345 LTT-तिरुवनंतपुरम नेत्रावती एक्स्प्रेस या गाड्या डाउन फास्ट मार्गावरून वळविण्यात येणार आहेत. त्यामुळे या गाड्या नियोजित वेळेपेक्षा १० ते १५ मिनिटे उशिराने धावण्याची शक्यता आहे.

अप दिशेने धावणाऱ्या 22226 सोलापूर-CSMT वंदे भारत एक्स्प्रेस, 11010 पुणे-CSMT सिंहगड एक्स्प्रेस, 12124 पुणे-CSMT डेक्कन क्वीन, 12126 पुणे-CSMT प्रगती एक्स्प्रेस, 12134 मंगळुरू-CSMT एक्स्प्रेस, 13201 राजगीर-LTT जनता एक्स्प्रेस, 17221 काकीनाडा पोर्ट-LTT एक्स्प्रेस, 12168 बनारस-LTT सुपरफास्ट एक्स्प्रेस, 12321 हावडा-CSMT मुंबई मेल, 12812 हटिया-LTT एक्स्प्रेस, 11014 कोईम्बतूर-LTT एक्स्प्रेस, 17611 नांदेड-CSMT राज्यराणी एक्स्प्रेस आणि 22160 चेन्नई-CSMT सुपरफास्ट एक्स्प्रेस या गाड्यांना ठाणे-कल्याणदरम्यान अप फास्ट मार्गावरून वळविण्यात येणार आहे. या गाड्या गंतव्यस्थानी १० ते १५ मिनिटे उशिराने पोहोचण्याची शक्यता आहे.

या मेगा ब्लॉकचा परिणाम वसई रोड-दिवा मेमू सेवेवरही होणार आहे. 61003 वसई रोड-दिवा मेमू सकाळी ९.५० वाजता वसई रोडहून सुटल्यानंतर कोपर येथेच समाप्त करण्यात येईल. तर 61004 दिवा-वसई रोड मेमू दिवा स्थानकातून सकाळी ११.३० वाजता सुटणार असून, कोपर येथून सकाळी ११.४५ वाजता तिची सेवा सुरू होईल. त्यामुळे दिवा-कोपरदरम्यान मेमू सेवा रद्द राहणार आहे.

दरम्यान, CSMT-कल्याण मेन लाइन, CSMT-पनवेल हार्बर लाइन, ट्रान्स-हार्बर लाइन तसेच बेलापूर-उरण पोर्ट लाइनवर कोणताही मेगा ब्लॉक घेण्यात येणार नाही. पायाभूत सुविधांची देखभाल आणि प्रवासी सुरक्षेच्या दृष्टीने हा ब्लॉक आवश्यक असल्याचे मध्य रेल्वेने स्पष्ट केले आहे. प्रवाशांना होणाऱ्या गैरसोयीबद्दल मध्य रेल्वेने दिलगिरी व्यक्त केली आहे.