‘आपले सण, आपली संस्कृती’ १७ मिनिटांच्या चलचित्र देखाव्यातून मराठी संस्कृती जपण्याचा संदेश

मुंबई / घाटकोपर JPN NEWS - गणेशोत्सव हा केवळ धार्मिक उत्सव नसून आपल्या संस्कृती, परंपरा आणि संस्कारांची नाळ पुढील पिढीशी जोडणारा उत्सव आहे. याच विचारातून गणेश नगर, साईनाथ नगर रोड, घाटकोपर (प.) येथील श्री सार्वजनिक गणेशोत्सव मंडळ ‘गणेश नगरचा सम्राट’ यंदाच्या ६२व्या वर्षात ‘आपले सण, आपली संस्कृती’ हा आगळावेगळा चलचित्र देखावा सादर करत आहे.

अवघ्या १७ मिनिटांच्या चलचित्र सादरीकरणातून विविध सणांचे महत्त्व, त्यामागील संस्कृती, परंपरा आणि संस्कार प्रभावीपणे मांडण्यात आले आहेत. स्व. उत्सवप्रमुख मुकुंद थोरात यांच्या मार्गदर्शनातून आणि त्यांनी निर्माण केलेल्या परंपरेतून पुढे आलेल्या या मंडळाचे अध्यक्ष शशिकांत थोरात यांच्यासह सर्व पदाधिकारी आणि कार्यकर्त्यांच्या सहकार्याने हा देखावा साकारण्यात आला आहे.

मोबाईलमध्ये हरवलेल्या पिढीला संस्कृतीची ओळख - 

देखाव्याची सुरुवात आधुनिक जीवनशैलीत मोबाईल आणि पाश्चात्त्य संस्कृतीच्या प्रभावात रमलेल्या तरुण पिढीपासून होते. घरात गणपती बाप्पांचे आगमन झालेले असतानाही दोन मुले मोबाईलमध्ये व्यस्त असून पाश्चात्त्य गाण्यांवर नृत्य करताना दाखवण्यात आली आहेत.

याच वेळी आजोबांचे आगमन होते. ते मुलांना आपल्या सणांचे महत्त्व समजावून सांगतात. विविध सण का साजरे केले जातात, त्यामागील संस्कार आणि परंपरा काय आहेत, तसेच या सणांमधून पुढील पिढीपर्यंत कोणता सांस्कृतिक वारसा पोहोचतो, हे संवादातून प्रभावीपणे मांडण्यात आले आहे.

मनोरंजनासोबत संस्कृती जपण्याचा संदेश - 

आधुनिक तंत्रज्ञान आणि बदलत्या जीवनशैलीमुळे लोप पावत चाललेल्या मराठी संस्कृतीची ओळख नव्या पिढीला करून देणे, तसेच आपल्या सण-परंपरांचे महत्त्व जपणे हा या देखाव्यामागील मुख्य उद्देश आहे. मनोरंजन, अभिनय आणि प्रभावी सादरीकरणाच्या माध्यमातून हा संदेश प्रेक्षकांपर्यंत पोहोचवण्यात आला आहे.

देखावा पाहताना प्रेक्षकांना मनोरंजनासोबतच आपल्या सण-परंपरांविषयी आत्मीयता आणि अभिमानाची भावना निर्माण होत आहे. देखावा पाहिल्यानंतर कलाकार आणि मंडळाच्या उपक्रमाचे प्रेक्षकांकडून कौतुक होत आहे.

कलाकार आणि तंत्रज्ञांच्या मेहनतीला श्रेय - 

या देखाव्याचे लेखन आणि दिग्दर्शन नितीन चौधरी यांनी केले आहे. नाट्य क्षेत्रातील त्यांच्या अनुभवाचा प्रत्यय या सादरीकरणातून येतो.

नितीन चौधरी म्हणाले, “या देखाव्याचे लेखन व दिग्दर्शन मी केले असले, तरी माझ्यासोबत काम करणाऱ्या प्रत्येक कलाकाराची आणि तंत्रज्ञाची मेहनत तितकीच महत्त्वाची आहे. सर्वांच्या एकत्रित प्रयत्नांमुळेच हा देखावा उत्कृष्ट पद्धतीने सादर करता आला.”

‘आपले सण, आपली संस्कृती’ या चलचित्र देखाव्याच्या माध्यमातून गणेश नगरचा सम्राट मंडळाने गणेशोत्सवाच्या उत्साहासोबतच मराठी संस्कृती, परंपरा आणि संस्कार पुढील पिढीपर्यंत पोहोचवण्याचा प्रयत्न केला आहे.