नवी मुंबई/पुणे JPN NEWS - कर्तव्य बजावणाऱ्या सरकारी कर्मचाऱ्यांवर हल्ले होण्याच्या दोन गंभीर घटना नवी मुंबई आणि पुण्यात समोर आल्या आहेत. नवी मुंबईतील नेरूळ येथे मीटरप्रमाणे रिक्षाचे भाडे मागितल्याच्या वादातून आरटीओच्या सहायक मोटार वाहन निरीक्षकाला रिक्षाचालक आणि त्याच्या साथीदारांनी मारहाण केल्याचा आरोप आहे. तर पुणे रेल्वे स्थानक परिसरात रेल्वे रुळांवर गांजा पिणाऱ्यांना हटकणाऱ्या पोलीस शिपायावर धारदार कोयत्याने हल्ला करण्यात आला. दोन्ही घटनांमुळे सरकारी कर्मचाऱ्यांच्या सुरक्षिततेचा प्रश्न ऐरणीवर आला आहे.
मीटरप्रमाणे भाडे मागितल्याने आरटीओ अधिकाऱ्याला मारहाण -
नवी मुंबईतील नेरूळ येथे सहायक मोटार वाहन निरीक्षक तुषार तानाजी कदम (३३) यांच्यावर रिक्षाचालकासह त्याच्या साथीदारांनी हल्ला केल्याची घटना ७ सप्टेंबर रोजी पहाटे घडली.
कदम हे एल.पी. पुलाजवळून उलवे येथे जाण्यासाठी रिक्षेत बसले होते. रिक्षाचालकाने मीटरप्रमाणे भाडे न आकारता ३०० रुपयांची मागणी केली. कदम यांनी मीटरप्रमाणे भाडे देण्याचा आग्रह धरत आपण आरटीओ अधिकारी असल्याचे सांगितल्यानंतर चालकाने त्यांच्याशी वाद घातल्याचे तक्रारीत नमूद आहे.
त्यानंतर चालकाने पाच ते सहा साथीदारांना बोलावून घेत कदम यांना लाथाबुक्क्यांनी मारहाण केल्याचा आरोप आहे. या हल्ल्यात त्यांच्या डोळ्याला आणि तोंडाला दुखापत झाली. तसेच जीवे मारण्याची आणि समाजमाध्यमांवर व्हिडीओ प्रसारित करून बदनामी करण्याची धमकी दिल्याचेही तक्रारीत म्हटले आहे.
या प्रकरणी नेरूळ पोलिसांनी मारहाण, बेकायदा जमाव, दंगल, शिवीगाळ आणि धमकीसह विविध कलमांनुसार गुन्हा दाखल केला आहे. पोलीस उपनिरीक्षक बिपीन तुतुरवाड तपास करीत आहेत.
पुण्यात गांजा पिणाऱ्यांना हटकले; पोलीस शिपायावर कोयत्याने हल्ला -
दुसरी घटना पुणे रेल्वे स्थानक परिसरात घडली. रेल्वे रुळांवर गांजा पिणाऱ्या टोळक्याला हटकणाऱ्या पोलीस शिपाई अक्षय बांबल यांच्यावर धारदार कोयत्याने हल्ला करण्यात आला. या हल्ल्यात बांबल गंभीर जखमी झाले आहेत.
प्राथमिक माहितीनुसार, अक्षय बांबल हे पुणे रेल्वे स्थानक परिसरात कर्तव्यावर असताना काही जण रेल्वे रुळांवर गांजा पित असल्याचे त्यांच्या निदर्शनास आले. त्यांनी संबंधितांना हटकले असता टोळक्याने त्यांच्याशी वाद घातला आणि त्यानंतर अचानक हल्ला केला. यावेळी त्यांच्या गळ्यावर कोयत्याने वार करण्यात आल्याची माहिती आहे.
घटनेनंतर जखमी पोलीस शिपायाला उपचारासाठी रुग्णालयात दाखल करण्यात आले असून त्यांच्यावर उपचार सुरू आहेत. हल्लेखोरांविरोधात कारवाईची प्रक्रिया सुरू आहे.
सरकारी कर्मचाऱ्यांच्या सुरक्षेचा प्रश्न -
नवी मुंबईत आरटीओ अधिकाऱ्याला केवळ मीटरप्रमाणे भाडे देण्याचा आग्रह केल्याच्या वादातून मारहाण, तर पुण्यात कर्तव्य बजावताना पोलीस शिपायावर धारदार शस्त्राने हल्ला झाल्याने सरकारी कर्मचाऱ्यांच्या सुरक्षेचा प्रश्न पुन्हा ऐरणीवर आला आहे. सार्वजनिक ठिकाणी कायदा-सुव्यवस्था राखण्याचे आणि नियमांची अंमलबजावणी करण्याचे काम करणाऱ्या कर्मचाऱ्यांवरच हल्ले होत असल्याने अशा घटनांवर कठोर कारवाईची गरज व्यक्त होत आहे.
No comments:
Post a Comment