
मुंबई | JPN NEWS -
मुंबईतील छत्रपती शिवाजी महाराज टर्मिनस (CSMT) रेल्वे स्थानकाला बॉम्बने उडवण्याची धमकी मिळाल्याने शनिवारी (१४ नोव्हेंबर) सायंकाळी सुरक्षा यंत्रणांमध्ये एकच खळबळ उडाली. पोलीस नियंत्रण कक्षाच्या डायल ११२ या आपत्कालीन हेल्पलाइनवर अज्ञात व्यक्तीने फोन करून CSMT स्थानकात बॉम्ब ठेवल्याचा दावा केला. या धमकीनंतर रेल्वे पोलीस, रेल्वे सुरक्षा दल आणि मुंबई पोलिसांनी तातडीने सुरक्षा व्यवस्था वाढवून संपूर्ण स्थानक परिसरात तपासणी मोहीम राबवली. मात्र, सुमारे तीन तास चाललेल्या शोधमोहिमेत कोणतीही स्फोटक सामग्री किंवा संशयास्पद वस्तू आढळली नाही.
मिळालेल्या माहितीनुसार, शनिवारी सायंकाळी सुमारे ६.५० वाजण्याच्या सुमारास डायल ११२ हेल्पलाइनवर धमकीचा फोन आला. फोन करणाऱ्या व्यक्तीने CSMT रेल्वे स्थानकात बॉम्ब ठेवल्याचे सांगितले. धमकीची माहिती मिळताच पोलिसांनी तातडीने संबंधित सुरक्षा यंत्रणांना सतर्क केले. त्यानंतर बॉम्ब शोधक आणि निकामी करणारे पथक (BDDS) तसेच श्वानपथक घटनास्थळी दाखल झाले.
स्थानकातील सर्व भागांची कसून तपासणी -
रेल्वे सुरक्षा दल (RPF), शासकीय रेल्वे पोलीस (GRP), मुंबई पोलीस आणि अन्य सुरक्षा यंत्रणांनी संयुक्तपणे स्थानकाची तपासणी केली. उपनगरी रेल्वे फलाट, लांब पल्ल्याच्या गाड्यांचे फलाट, पादचारी पूल, पार्सल विभाग तसेच स्थानक परिसरातील विविध ठिकाणी शोधमोहीम राबवण्यात आली. प्रवासी आणि त्यांच्या सामानाचीही तपासणी करण्यात आली.
सुमारे रात्री ९.३० वाजेपर्यंत ही तपासणी सुरू होती. मात्र, या संपूर्ण मोहिमेदरम्यान कोणतीही संशयास्पद वस्तू, बेवारस सामान किंवा स्फोटक सामग्री आढळली नाही. त्यामुळे बॉम्बची धमकी अफवा ठरल्याचे प्राथमिक तपासणीत स्पष्ट झाले.
धमकी देणाऱ्या व्यक्तीचा शोध सुरू -
धमकीचा फोन करणाऱ्या व्यक्तीची ओळख पटवण्यासाठी पोलिसांनी तपास सुरू केला आहे. फोनचा स्रोत, संबंधित मोबाइल क्रमांक आणि कॉलमागील उद्देश यांचा शोध घेतला जात आहे. अशा प्रकारे खोटी धमकी देऊन सार्वजनिक ठिकाणी भीतीचे वातावरण निर्माण करणाऱ्यांविरोधात कठोर कारवाई होण्याची शक्यता आहे.
मुंबईतील अन्य महत्त्वाच्या रेल्वे स्थानकांवरही सुरक्षा वाढवली -
CSMT येथील घटनेनंतर खबरदारीचा उपाय म्हणून मुंबईतील अन्य प्रमुख रेल्वे स्थानकांवरही सुरक्षा व्यवस्था अधिक कडक करण्यात आली. लोकमान्य टिळक टर्मिनस (LTT), ठाणे, कल्याण आणि इतर महत्त्वाच्या स्थानकांवर सुरक्षा पथकांची तैनाती वाढवण्यात आली. प्रवासी आणि सामानाची तपासणी अधिक सतर्कतेने करण्याच्या सूचना देण्यात आल्या आहेत.
दरम्यान, याच आठवड्यात मुंबईतील काही महत्त्वाच्या ठिकाणांना ई-मेलद्वारे धमक्या मिळाल्याच्या घटनाही समोर आल्या होत्या. त्यामध्ये अभिनेता अमिताभ बच्चन यांचे निवासस्थान, मुंबई महापौर कार्यालय, छत्रपती शिवाजी महाराज आंतरराष्ट्रीय विमानतळ, महालक्ष्मी रेसकोर्स तसेच काही बँका आणि न्यायालयांचा उल्लेख होता. त्या ठिकाणीही सुरक्षा यंत्रणांनी तपासणी केली होती; मात्र काहीही संशयास्पद आढळले नव्हते.
सणासुदीच्या काळात रेल्वे स्थानकांवर प्रवाशांची मोठी गर्दी होत असताना CSMTला मिळालेल्या धमकीमुळे सुरक्षा यंत्रणा सतर्क झाल्या आहेत. धमकीमागील व्यक्तीचा शोध आणि या घटनांमध्ये काही परस्पर संबंध आहे का, याचा तपास सुरू आहे.


No comments:
Post a Comment