पश्चिम रेल्वेच्या हॉस्पिटलची बेपर्वाई

पश्चिम रेल्वेच्या हॉस्पिटलची बेपर्वाई

लोकल ट्रॅकवर किंवा स्टेशनात होणाऱ्या अपघातांतील जखमींना तात्काळ वैद्यकीय उपचार देण्याचे आदेश असले तरी खुद्द रेल्वे हॉस्पिटलने त्याकडे दुर्लक्ष केल्याचे प्रकरण समोर आले आहे. सुमन सिंग (२३) ही तरुणी मरिन लाइन्स येथे लोकल पकडताना जखमी झाली. मात्र , पश्चिम रेल्वेच्या हॉस्पिटलमध्ये या तरुणीवर योग्य उपचार न झाल्याने त्यांना खासगी हॉस्पिटलचा आधार घ्यावा लागला. विशेष म्हणजे , हा धक्कादायक प्रकार सुमनचे वडील ' आयआरसीटीसी ' मध्ये वरिष्ठ पदावर कार्यरत असतानाही घडला. 

लोकल पकडताना तोल सुटल्याने सुमनच्या उजव्या पायास मार लागला होता. त्यावेळी तिला मुंबई सेंट्रल येथील जगजीवनराम हॉस्पिटलमध्ये नेण्यात आले. मात्र , हे हॉस्पिटल रेल्वे कर्मचाऱ्यांसाठी असल्याचा दावा करत तिच्यावर मामुली उपचार केले गेले. सुमनचे वडील ' इंडियन रेल्वे टुरिझम अँड कॅटरिंग कॉर्पोरेशन ' मध्ये (आयआरसीटीसी) सहव्यवस्थापक आहेत. तरीही सुमनला प्रवेश नाकारला गेल्याचे कळताच रेल्वे अधिकाऱ्यांपासून प्रवासी संघटनांमध्ये नाराजी पसरली आहे. 

रेल्वेच्या हॉस्पिटलमध्ये रेल्वे कर्मचाऱ्यांव्यतिरिक्त आपत्कालीन परिस्थितीत पेशंट दाखल करताना जादा शुल्क आकारले जाते. मात्र , सुमन रेल्वे अपघातग्रस्त असतानाही तिला प्रवेश नाकारल्याबद्दल आश्चर्य व्यक्त केले जात आहे. दरम्यान रेल्वेच्या हॉस्पिटलमध्ये खासगी पेशंटही दाखल केले जातात. मात्र , त्यावेळी जागा उपलब्ध नसल्याने प्रवेश देता आला नसल्याची माहिती पश्चिम रेल्वेचे जनसंपर्क अधिकारी नितीन डेविड यांनी दिली.