मुंबई (प्रतिनिधी) - मध्य रेल्वेने प्रवाशांच्या सेवेसाठी कोचमधील अस्वच्छतेच्या तक्रारींची नोंद घेणारी ‘क्लीनमायकोच डॉटकॉम’ ही वेबसाइट तयार केली होती, परंतु इंटरनेटचे कनेक्शन ट्रेनच्या प्रवासात मध्येच गायब होत असल्याची तक्रार आल्यानंतर केवळ ‘पीएनआर’ नंबर ५८८८८ या हेल्पलाइनवर ‘एसएमएस’ केल्यावर कोचमध्ये पंधरा मिनिटांत सफाई कामगारांना धाडणारी नवी योजना सुरू झाली. परंतु धावत्या मेल-एक्स्प्रेसमध्ये प्रवाशांच्या तक्रारीची दखल घेतली आहे की नाही याचा पडताळा घेणे कठीण झाले होते. आता मध्य रेल्वे कोचमध्ये आधुनिक असे रेडिओ फ्रिक्वेन्सी आयडेंटीफिकेशन डीव्हाईस तंत्रज्ञान वापरणार आहे. सफाई कामगाराच्या हातात हॅण्डसेट देण्यात येणार असून त्याने सफाई करण्यापूर्वी आणि केल्यानंतर रेडिओ टॅगला स्वाइप करण्याचे बंधन आहे. त्याच्या नोंदीनंतरच संबंधित कंत्राटदाराला पैसे मिळणार आहेत. सुरुवातीला मुंबई-मंगलोर, पंजाब मेल, कोणार्क, दादर-चेन्नई इग्मोर एक्स्प्रेस या चार गाड्यांमध्ये ही सेवा लागू झाली असल्याचे मध्य रेल्वेचे मुख्य जनसंपर्क अधिकारी नरेंद्र पाटील यांनी सांगितले.
Post Top Ad
Post Bottom Ad
