9 Oct 2015 महापालिका हद्दीतील रस्ते स्वच्छता करण्यासाठी काढण्यात आलेल्या निविदांमधील काही अटी व शर्ती शिथिल केल्यास अथवा त्यात बदल केल्यास अधिकाधिक बिगर शासकीय संस्थांना कामे मिळून त्यांना स्वयंरोजगार प्राप्त होऊ शकेल, अशी विनंती स्थायी समिती अध्यक्ष यशोधर फणसे यांनी गटनेत्यांच्या सभेत आज (दिनांक ०९ ऑक्टोबर, २०१५) केली, त्यास गटनेत्यांच्या सभेने मंजुरी दिली आहे.
महापालिकेच्या २४ विभागांमध्ये रस्ते स्वच्छता योजनेतंर्गत नव्याने काढण्यात आलेल्या निविदांमधील कंत्राटी कामगार नियम व निर्मूलन कायदा १९७० अन्वये परवाना, कामगार राज्य विमा योजना १९४८ अंतर्गत नोंदणी,कामगार भविष्य निर्वाह अधिनियम १९४२ अंतर्गत नोंदणी या अटी अनिवार्य करण्यात आल्या आहेत. तथापि, या अटी कंत्राट मिळाल्यानंतर पूर्ण करण्याची शिथिलता प्रदान करावी अथवा त्यात बदल करावेत, जेणेकरुन स्थानिक बिगर शासकीय संस्थांना कामे मिळून स्वयंरोजगार मिळण्यास मदत होईल, या आशयाची विनंती माजी महापौर तथा आमदार सुनील प्रभू आणि नगरसेवक . उदेश पाटेकर यांनी स्थायी समिती अध्यक्ष यशोधर फणसे यांचेकडे केली होती. फणसे यांनी या संदर्भात महापौरांच्या अध्यक्षतेखाली झालेल्या गटनेत्यांच्या सभेपुढे सदर पत्र विचारार्थ पाठविले होते. या अटी शिथिल करण्यास, योग्य ते बदल करण्यास गटनेत्यांच्या सभेने मान्यता दिली आहे.
