तक्रारीनंतर पालिकेकडून 'संविधान चौक'वरील प्रतिकृतीवर कारवाई होणार; आंदोलनाचा इशारा

मुंबई | जेपीएन न्यूज - 

घाटकोपर (पूर्व) येथील पंतनगरमधील 'संविधान चौक' येथे उभारण्यात आलेल्या डॉ. बाबासाहेब आंबेडकर यांच्या अर्धपुतळ्याची आणि भारतीय संविधानाच्या प्रतिकृतीवर बृहन्मुंबई महापालिकेकडून प्रस्तावित कारवाईवरून नवा वाद निर्माण झाला आहे. या कारवाईविरोधात आंदोलनाची हाक देणाऱ्या संविधानप्रेमी नागरिकांनी आणि सामाजिक कार्यकर्त्यांनी संबंधित संस्थांच्या तक्रारीनंतर ही कारवाई होत असल्याचा आरोप केला आहे.

आंदोलनकर्त्यांच्या म्हणण्यानुसार, मुंबई महापालिकेने या चौकाला अधिकृतपणे "संविधान चौक" असे नाव दिले आहे. त्यानंतर स्थानिक नागरिकांनी या ठिकाणी संविधान निर्माते डॉ. बाबासाहेब आंबेडकर यांचा अर्धपुतळा आणि भारतीय संविधानाची प्रतिकृती उभारण्यासाठी महापालिकेकडे परवानगी मागितली होती. या प्रस्तावाला म्हाडाकडून ना हरकत प्रमाणपत्र (NOC) देण्यात आल्याचाही त्यांचा दावा आहे.

आंदोलनकर्त्यांच्या दाव्यानुसार, या प्रतिकृतीच्या उभारणीसाठी स्थानिक आमदार पराग शहा यांनी पाच लाख रुपयांचा निधी उपलब्ध करून दिला होता. मात्र, आविष्कार युवा मंडळ, ओम साई संस्था आणि श्री शिवशंभू राजे प्रतिष्ठान यांनी केलेल्या तक्रारीनंतर महापालिकेने संबंधित प्रतिकृतीवर कारवाईची नोटीस बजावली असल्याचे आंदोलनकर्त्यांचे म्हणणे आहे.

आंदोलनकर्त्यांचा आरोप आहे की, डॉ. बाबासाहेब आंबेडकर आणि भारतीय संविधानाच्या प्रतीकात्मक स्मारकावर कारवाई करणे हा संविधानाचा अपमान असून हा निर्णय तातडीने मागे घ्यावा. या कारवाईविरोधात १६ जुलै रोजी सकाळी १० वाजता संविधान चौक येथे शांततापूर्ण आंदोलन करण्याचे आवाहन करण्यात आले आहे.

दरम्यान, महापालिकेने बजावलेल्या नोटिशीनुसार संबंधित प्रतिकृती अनधिकृत बांधकाम असल्याचे नमूद करण्यात आले असून ती २४ तासांत हटविण्याच्या सूचना देण्यात आल्या आहेत. नोटिशीत आविष्कार युवा मंडळ, ओम साई संस्था आणि श्री शिवशंभू राजे प्रतिष्ठान यांच्या तक्रारींचा संदर्भ देण्यात आला आहे.

या प्रकरणावर संबंधित संस्था, आमदार पराग शहा किंवा बृहन्मुंबई महापालिकेची सविस्तर भूमिका अद्याप समोर आलेली नाही. ती प्राप्त झाल्यानंतर प्रसिद्ध करण्यात येईल.