अन्न भेसळीविरोधात तुकाराम मुंढेंची धडक कारवाई; १०० दिवसांत ९०४ छापे, ३४.७ कोटींचा माल जप्त

मुंबई JPN NEWS - महाराष्ट्रात अन्न भेसळ, अस्वच्छता आणि अन्नसुरक्षा नियमांचे उल्लंघन करणाऱ्यांविरोधात अन्न व औषध प्रशासनाने (FDA) धडक मोहीम सुरू केली आहे. FDA आयुक्त तुकाराम मुंढे यांनी २५ मे रोजी पदभार स्वीकारल्यानंतर राज्यभर कारवाईला वेग आला आहे. पदभार स्वीकारल्यानंतरच्या पहिल्या १०० दिवसांत FDAच्या पथकांनी राज्यात मोठ्या प्रमाणावर छापेमारी करत नियमांचे उल्लंघन करणाऱ्या आस्थापनांवर कारवाई केली.

या १०० दिवसांच्या कालावधीत FDAच्या पथकांनी ९०४ ठिकाणी छापे टाकले. या कारवाईदरम्यान नियमांचे पालन न करणारी तसेच संशयास्पद आणि भेसळयुक्त खाद्यपदार्थांची उत्पादने मोठ्या प्रमाणावर जप्त करण्यात आली. जप्त करण्यात आलेल्या मालाची किंमत तब्बल ३४.७ कोटी रुपये असल्याची माहिती समोर आली आहे.

४५७ जणांना अटक - 

अन्नसुरक्षा नियमांचे उल्लंघन करणाऱ्या प्रकरणांमध्ये प्रशासनाने कठोर भूमिका घेतली आहे. कारवाईदरम्यान ४५७ जणांना अटक करण्यात आली, तर नियमांचे गंभीर उल्लंघन करणाऱ्या ३२२ आस्थापना सील करण्यात आल्या. या मोहिमेत केवळ अन्नपदार्थांची भेसळ तपासण्यापुरते प्रशासन मर्यादित राहिलेले नाही. ग्राहकांना अस्वच्छ वातावरणात खाद्यपदार्थ तयार करून देणारी हॉटेल्स, रेस्टॉरंट्स, खाद्यगृहे, अनधिकृत स्वयंपाकगृहे तसेच आवश्यक परवाने नसलेल्या व्यावसायिक आस्थापनांवरही कारवाई करण्यात येत आहे.

अस्वच्छ हॉटेल्स आणि अनधिकृत किचन रडारवर - 

अन्न तयार करण्याच्या ठिकाणी स्वच्छता राखली जाते का, खाद्यपदार्थ योग्य पद्धतीने साठवले जातात का, उत्पादनासाठी आवश्यक परवाने आहेत का, तसेच अन्नसुरक्षा नियमांचे पालन केले जाते का, याची तपासणी FDAच्या पथकांकडून केली जात आहे.

विशेषतः अस्वच्छ खाद्यपदार्थ विक्री केंद्रे, भेसळयुक्त खाद्यपदार्थ आणि परवान्याशिवाय सुरू असलेल्या किचनवर कारवाईचा फोकस वाढवण्यात आला आहे. ग्राहकांच्या आरोग्याशी तडजोड करणाऱ्या व्यावसायिकांवर कारवाईचा बडगा उगारण्यात आल्याने खाद्य व्यवसाय क्षेत्रातही खळबळ उडाली आहे.

अन्नापासून औषधांपर्यंत लक्ष - 

FDAच्या कारवाईचा विस्तार आता केवळ अन्नसुरक्षेपुरता मर्यादित नसून औषधे आणि फार्मास्युटिकल उत्पादनांच्या सुरक्षिततेकडेही लक्ष देण्यात येत आहे. औषधांच्या गुणवत्ता आणि सुरक्षिततेशी संबंधित नियमांचे उल्लंघन करणाऱ्यांवरही तपासणी आणि कारवाई करण्यावर भर दिला जात आहे. राज्यातील नागरिकांना सुरक्षित आणि दर्जेदार अन्न तसेच औषधे उपलब्ध व्हावीत, यासाठी प्रशासनाने तपासणी आणि अंमलबजावणीची प्रक्रिया अधिक कडक केली आहे.

पुढील काळातही कारवाई सुरू राहणार -

पहिल्या १०० दिवसांतील कारवाईची आकडेवारी पाहता FDAने अन्न भेसळ आणि अन्नसुरक्षा उल्लंघनांविरोधात व्यापक मोहीम उघडल्याचे स्पष्ट होते. ९०४ छापे, ३४.७ कोटी रुपयांचा जप्त माल, ४५७ अटक आणि ३२२ आस्थापना सील या कारवाईमुळे नियमांचे उल्लंघन करणाऱ्यांना कडक संदेश देण्यात आला आहे.