मुंबई JPN NEWS - घाटकोपर रेल्वे स्थानकाच्या पश्चिमेकडील स्कायवॉकवर कौटुंबिक वादातून पतीने आपल्या लहान मुलाला खाली फेकल्याचा गंभीर आरोप समोर आला आहे. या घटनेत मुलाच्या डोक्याला गंभीर दुखापत झाली. याप्रकरणी घाटकोपर पोलिसांनी २३ वर्षीय आरोपी पतीविरुद्ध खुनाच्या प्रयत्नासह संबंधित कलमांनुसार गुन्हा दाखल केला आहे.
पोलिसांनी दिलेल्या माहितीनुसार, २५ ऑक्टोबर रोजी रात्री सुमारे ८.१० वाजता २२ वर्षीय महिला आणि तिच्या पतीमध्ये घाटकोपर रेल्वे स्थानकाच्या पश्चिमेकडील स्कायवॉकवर वाद झाला. यावेळी आरोपीने महिलेला शिवीगाळ केली तसेच तिला आणि मुलाला स्कायवॉकवरून खाली फेकण्याची धमकी दिल्याचे तक्रारीत नमूद आहे.
महिलेने मुलाला परत मागितल्यानंतर आरोपीने रागाच्या भरात मुलाचा जीव घेण्याच्या उद्देशाने त्याला स्कायवॉकवरून खाली फेकल्याचा आरोप आहे. या घटनेत मुलाच्या डोक्याला गंभीर दुखापत झाली. या प्रकारामुळे परिसरात खळबळ उडाली.
महिलेने दिलेल्या तक्रारीवरून घाटकोपर पोलीस ठाण्यात २६ ऑक्टोबर रोजी गुन्हा क्रमांक १२८०/२०२६ नोंदवण्यात आला. आरोपीविरुद्ध भारतीय न्याय संहिता २०२३ मधील कलम १०९(१), ३५१(३) आणि ३५२ अंतर्गत गुन्हा दाखल करण्यात आला आहे. मुलाची पुढील वैद्यकीय स्थिती आणि आरोपीविरुद्ध झालेल्या कारवाईबाबत अधिक माहिती उपलब्ध झालेली नाही.
No comments:
Post a Comment