मुंबई JPN NEWS - महाराष्ट्र राज्य मार्ग परिवहन महामंडळातील (एसटी) सुमारे ८३ हजार अधिकारी आणि कर्मचाऱ्यांची दिवाळी गोड करण्यासाठी नोव्हेंबर महिन्याचे वेतन सणापूर्वीच देण्याची तयारी करण्याचे निर्देश परिवहन मंत्री तथा एसटी महामंडळाचे अध्यक्ष प्रताप सरनाईक यांनी प्रशासनाला दिले आहेत. कर्मचाऱ्यांना दिवाळीच्या खरेदीसह घरगुती खर्चाचे नियोजन करता यावे, यासाठी वेळेत वेतन देण्याच्या दृष्टीने आवश्यक कार्यवाही तातडीने करावी, असे त्यांनी स्पष्ट केले.
एसटी महामंडळातील अधिकारी आणि कर्मचाऱ्यांचे वेतन साधारणपणे दर महिन्याच्या ७ ते १० तारखेदरम्यान अदा केले जाते. मात्र, यंदा ६ नोव्हेंबरपासून दिवाळी सणाला सुरुवात होत असल्याने कर्मचाऱ्यांना सणापूर्वीच वेतन मिळणे आवश्यक आहे. ही बाब लक्षात घेऊन सरनाईक यांनी एसटी प्रशासनाला वेतन वितरणाचे नियोजन करण्याच्या सूचना दिल्या आहेत.
दिवाळीपूर्वी वेतन देण्यासाठी महामंडळाच्या अर्थ व नियोजन विभागाने शासनाकडे तातडीने पाठपुरावा करावा, असे निर्देशही देण्यात आले आहेत. कर्मचाऱ्यांच्या वेतनासाठी आवश्यक असलेले शासकीय अनुदान तसेच प्रवाशांना विविध सवलती दिल्यापोटी महामंडळाला शासनाकडून मिळणारी प्रलंबित प्रतिपूर्तीची रक्कम वेळेत उपलब्ध व्हावी, यासाठी विशेष प्रयत्न करण्यास सांगण्यात आले आहे.
एसटी महामंडळाच्या आर्थिक अडचणींमुळे कर्मचाऱ्यांच्या दिवाळीच्या आनंदावर परिणाम होऊ नये, यासाठी प्रशासनाने या विषयाला सर्वोच्च प्राधान्य द्यावे, असे सरनाईक यांनी स्पष्ट केले. शासनाच्या संबंधित विभागांशी समन्वय साधून आवश्यक निधी उपलब्ध करून घेणे आणि त्यानुसार वेतन वितरणाचे नियोजन करणे गरजेचे असल्याचेही त्यांनी नमूद केले.
दरम्यान, दिवाळीपूर्वी वेतन देण्याच्या दृष्टीने प्रशासनाने आवश्यक ती कार्यवाही करावी, असे निर्देश देण्यात आले असले, तरी प्रत्यक्ष वेतन जमा होण्याची तारीख आणि निधी उपलब्धतेबाबतची अधिकृत माहिती अद्याप स्पष्ट करण्यात आलेली नाही.
No comments:
Post a Comment