मुंबई सेंट्रल ते नवी दिल्ली 48 फेर्‍या चालविण्यात येणार

मुंबई : दसरा, दिवाळी सणांनिमित्त बाहेरगावी जाणार्‍या प्रवाशांच्या सोयीसाठी पश्चिम रेल्वे प्रशासनाने मुंबई सेंट्रल ते नवी दिल्ली स्थानकां दरम्यान एसी सुपर फास्ट स्पेशल ट्रेन चालविण्याचा निर्णय घेतला आहे. या गाडीच्या 48 फेर्‍या चालविण्यात येणार आहेत. त्यामुळे प्रवाशांना दिलासा मिळणार आहे. 09003 मुंबई सेंट्रल ते नवी दिल्ली एसी सुपर फास्ट स्पेशल ट्रेन 9 ऑक्टोबर ते 29 डिसेंबरदरम्यान दर मंगळवारी आणि शनिवारी मुंबई सेंट्रलहून संध्याकाळी 7 वाजून 45 मिनिटांनी सुटणार असून नवी दिल्ली येथे दुसर्‍या दिवशी संध्याकाळी 5 वाजून 35 मिनिटांनी पोहोचणार आहे. तर परतीच्या प्रवासासाठी 09004 नवी दिल्ली-मुंबई सेंट्रल एसी सुपर फास्ट स्पेशल ट्रेन 10 ऑक्टोबर ते 30 डिसेंबरदरम्यान दर बुधवारी आणि रविवारी रात्री 11 वाजून 40 मिनिटांनी सुटणार असून मुंबई सेंट्रलला दुसर्‍या दिवशी रात्री 9 वाजून 15 मिनिटांनी पोहोचणार आहे. या विशेष ट्रेनला बोरिवली, सुरत, वडोदरा, रतलाम, कोटा, गंगापूर सिटी, भरतपूर आणि मथुरा या स्थानकांवर थांबा देण्यात येणार आहे. प्रवासी या ट्रेनचे आरक्षण 7 ऑक्टोबरपासून करू शकतात.