मुंबई JPN NEWS - ढोल-ताशांचा निनाद, आरतीचा गजर, फुलांची उधळण आणि ‘गणपती बाप्पा मोरया’चा जयघोष… गेल्या ११ दिवसांपासून भक्तीच्या रंगात न्हाऊन निघालेल्या मुंबईत शुक्रवारी लाडक्या गणरायाला जड अंतःकरणाने निरोप देण्यात आला. बाप्पाच्या आगमनापासून घराघरांत आणि सार्वजनिक मंडळांमध्ये सुरू असलेला भक्तीचा सोहळा विसर्जनाच्या दिवशी भावुक वातावरणात संपन्न झाला.
अकरा दिवस मनोभावे पूजा-अर्चा, आरती आणि सेवा केल्यानंतर आपल्या लाडक्या बाप्पाला निरोप देताना अनेक भाविकांचे डोळे पाणावले. कुठे ढोल-ताशांचा गजर होता, तर कुठे बाप्पाच्या चरणी शेवटची आरती अर्पण करताना भक्तांचे मन भरून आले होते. ‘बाप्पा, पुढच्या वर्षी लवकर या’, अशी आर्त साद घालत भक्तांनी गणरायाला निरोप दिला.
गणेशमूर्ती विसर्जनासाठी सकाळपासूनच विविध विसर्जनस्थळांकडे गणेशभक्तांची लगबग सुरू होती. पारंपरिक वाद्यांच्या तालावर मिरवणुका निघाल्या. गुलालाची उधळण आणि भक्तांच्या जयघोषाने परिसर दुमदुमून गेला. घरगुती गणपतींपासून सार्वजनिक गणेशमूर्तींपर्यंत प्रत्येक बाप्पाच्या विसर्जनावेळी भक्तिभाव आणि भावनिक क्षण अनुभवायला मिळाले.
विसर्जन प्रक्रिया सुरळीत आणि सुरक्षितपणे पार पडावी यासाठी महापालिका, पोलीस आणि विविध प्रशासकीय यंत्रणांकडून आवश्यक व्यवस्था करण्यात आली होती. विसर्जनस्थळी सुरक्षा, आरोग्य, वाहतूक नियंत्रण आणि आपत्कालीन मदतीची व्यवस्था करण्यात आली होती.
महत्त्वाचे म्हणजे, ११व्या दिवसाच्या विसर्जनादरम्यान कोणतीही अनुचित घटना घडल्याची नोंद झालेली नाही. त्यामुळे भक्तिभाव, उत्साह आणि भावनिक वातावरणात विसर्जन सोहळा पार पडला.
गणरायाला निरोप देताना एकच भावना प्रत्येकाच्या मनात होती—‘बाप्पा, यंदा तू सुख-समृद्धी दिलीस… आता पुढच्या वर्षी पुन्हा लवकर ये!’ आणि याच भावनेने मुंबईकरांनी आपल्या लाडक्या गणरायाला जड अंतःकरणाने निरोप दिला.
२५ सप्टेंबर रोजी सायंकाळी ६ वाजेपर्यंत ११व्या दिवशी एकूण ५,७१५ गणेशमूर्तींचे विसर्जन झाले. यामध्ये १९८ सार्वजनिक गणेशमूर्ती, ५,४७१ घरगुती गणेशमूर्ती आणि ४६ गौरीमूर्तींचा समावेश आहे.
No comments:
Post a Comment