नवरात्र, दिवाळी आणि छठसाठी मध्य रेल्वेच्या ४१८ विशेष गाड्या; सीएसएमटी-गोरखपूरदरम्यान दररोज विशेष सेवा

मुंबई JPN NEWS - आगामी नवरात्र पूजा, दिवाळी आणि छठ सणांच्या पार्श्वभूमीवर प्रवाशांची वाढती गर्दी लक्षात घेऊन मध्य रेल्वेने विविध मार्गांवर तब्बल ४१८ विशेष रेल्वे सेवा चालविण्याची घोषणा केली आहे. मुंबई, पुणे, नागपूर, कोल्हापूर, लातूर यांसह उत्तर भारत, दक्षिण भारत आणि इतर महत्त्वाच्या शहरांना जोडणाऱ्या मार्गांवर या विशेष गाड्या धावणार आहेत.

सीएसएमटी मुंबई-गोरखपूर-सीएसएमटीदरम्यान दररोज विशेष गाड्या चालविण्यात येणार आहेत. ०१०७९ क्रमांकाची विशेष गाडी १६ ऑक्टोबर ते १६ नोव्हेंबरदरम्यान दररोज रात्री १०.३० वाजता सीएसएमटीहून सुटून तिसऱ्या दिवशी सकाळी १० वाजता गोरखपूरला पोहोचेल. परतीची ०१०८० क्रमांकाची गाडी १८ ऑक्टोबर ते १८ नोव्हेंबरदरम्यान दररोज दुपारी २.३० वाजता गोरखपूरहून सुटून तिसऱ्या दिवशी मध्यरात्री १२.४० वाजता सीएसएमटीला पोहोचेल. या सेवांच्या एकूण ६४ फेऱ्या असतील.

सीएसएमटी-चेन्नईदरम्यान १२ साप्ताहिक एसी विशेष गाड्या चालवल्या जाणार आहेत. तसेच सीएसएमटी-सृष्टी एम. विश्वेश्वरय्या टर्मिनल बंगळुरू मार्गावर १४ साप्ताहिक एसी विशेष सेवा उपलब्ध असतील. सीएसएमटी-लातूरदरम्यान २६ द्वि-साप्ताहिक विशेष फेऱ्या आणि सीएसएमटी-नागपूरदरम्यान १२ साप्ताहिक सुपरफास्ट विशेष फेऱ्या चालविण्यात येणार आहेत.

मुंबई-कोल्हापूर मार्गावरही १२ साप्ताहिक विशेष फेऱ्या जाहीर करण्यात आल्या आहेत. या गाड्या दादर, ठाणे, कल्याण, लोणावळा, पुणे, सातारा, कराड, सांगली, मिरज आणि हातकणंगले आदी स्थानकांवर थांबणार आहेत.

लोकमान्य टिळक टर्मिनसहून मऊ आणि बनारससाठी विशेष गाड्या चालविण्यात येणार आहेत. एलटीटी-मऊदरम्यान २४ द्वि-साप्ताहिक विशेष सेवा, तर एलटीटी-बनारसदरम्यान २४ द्वि-साप्ताहिक विशेष फेऱ्या असतील. याशिवाय एलटीटी-तिरुवनंतपुरम उत्तरदरम्यान १२ साप्ताहिक आणि एलटीटी-मडगावदरम्यान १४ साप्ताहिक विशेष सेवा चालविण्यात येणार आहेत.

पुणे-न्यू अमरावतीदरम्यान १२ साप्ताहिक एसी विशेष फेऱ्या चालविण्यात येतील. हडपसर-गाझीपूर सिटीदरम्यान २४ द्वि-साप्ताहिक विशेष सेवा, तर हडपसर-गोरखपूरदरम्यान ६४ दररोजच्या विशेष फेऱ्या उपलब्ध असतील.

नागपूर-हडपसर मार्गावर २६ द्वि-साप्ताहिक आणि १४ साप्ताहिक विशेष फेऱ्या चालविण्यात येणार आहेत. कोल्हापूर-कलाबुरगीदरम्यान आठवड्यातील शुक्रवार वगळता पाच दिवस विशेष गाड्या धावणार असून, या मार्गावर एकूण ६४ फेऱ्या असतील.

मध्य रेल्वेने दिलेल्या माहितीनुसार, या विशेष गाड्यांमध्ये एसी द्वितीय आणि तृतीय श्रेणी, स्लीपर तसेच जनरल द्वितीय श्रेणीचे डबे उपलब्ध असतील. काही गाड्यांमध्ये पॅन्ट्री आणि जनरेटर व्हॅनची सुविधाही असेल.

विशेष गाड्यांच्या आरक्षणाला टप्प्याटप्प्याने सुरुवात होणार आहे. ०१०७९, ०१०१५, ०१०१३, ०११०५, ०११०६, ०१४१७, ०१४१८, ०११२३, ०१४३१, ०१२०१ आणि ०१२०२ या गाड्यांचे आरक्षण २७ सप्टेंबरपासून सुरू होईल. तर ०१२३९, ०१२४०, ०१४६३, ०११७९, ०१०५१, ०१४०३, ०१४०४, ०१४१५, ०१२०९, ०१२१०, ०१४५१ आणि ०१४५२ या विशेष गाड्यांचे आरक्षण २८ सप्टेंबरपासून सुरू होणार आहे.

आरक्षण संगणकीकृत आरक्षण केंद्रांवर तसेच आयआरसीटीसीच्या संकेतस्थळावर करता येणार आहे. अनारक्षित डब्यांसाठी सामान्य शुल्क आकारले जाईल आणि यूटीएस प्रणालीद्वारे तिकीट काढता येईल. प्रवाशांना RailOne अॅपद्वारेही तिकीट बुक करण्याची सुविधा उपलब्ध आहे.

विशेष गाड्यांच्या विविध स्थानकांवरील सविस्तर वेळापत्रकासाठी प्रवाशांनी रेल्वेच्या अधिकृत चौकशी प्रणालीचा किंवा NTES अॅपचा वापर करावा, असे मध्य रेल्वेने आवाहन केले आहे.