1 जानेवारीपासून अनुदान लाभार्थीच्या खात्यावर

नवी दिल्ली : केंद्र सरकारने देशातील दारिद्रय़रेषेखालील जनतेला एक महिना आधीच नववर्षाची भेट दिली आहे. गरीबांना मिळणार्‍या अनुदानातील गळती थांबवून ते थेट लाभार्थीच्या पदरी पडण्यासाठी सरकारने सुरू केलेल्या महत्त्वाकांक्षी डायरेक्ट कॅश ट्रान्सफर योजनेची अंशत: सुरुवात मंगळवारपासून करण्यात आली. योजनेच्या या पहिल्या टप्प्यात तब्बल दहा लाख लाभार्थीच्या थेट खात्यामध्ये आता अनुदान जमा होणार आहे. या योजनेमुळे अर्थव्यवस्थेची कार्यक्षमता वाढण्यास मदत होईल, असे मत केंद्रीय अर्थमंत्री पी. चिदंबरम यांनी व्यक्त केले आहे. यात सर्वात महत्त्वाचे म्हणजे एलपीजी आणि रॉकेलच्या अनुदानाची रक्कम थेट लाभार्थीच्या खात्यात जमा होणार आहे. काँग्रेसने या योजनेला 'आप का पैसा, आप के हाथ' असे नाव दिले आहे. दरम्यान, महाराष्ट्रातील पाच जिल्ह्यांमध्ये पहिल्या टप्प्यात ही योजना लागू केली जाणार आहे.