फ्लॅटफॉर्म व फूटबोर्डमधील अंतरामुळे अपघात होतात असे नाही - रेल्वे प्रशासन

मुंबई : रेल्वे अपघातांमागे केवळ रेल्वेचा फ्लॅटफॉर्म व लोकल ट्रेनच्या फूटबोर्डमधील अंतर एवढेच कारण नाही तर या अपघातांमागे अनेक कारणे आहेत, असा दावा रेल्वे प्रशासनाने केला आहे. रेल्वे अपघातात मोनिका मोरे हिने आपले दोन्ही हात गमावल्याच्या वृत्तपत्रात प्रसिद्ध झालेल्या वृत्ताची मुंबई उच्च न्यायालयाने स्वत:हून दखल घेऊन सुमोटो याचिका दाखल करून घेतली आहे. त्या याचिकेसंदर्भात रेल्वे प्रशासनाने न्यायालयात प्रतिज्ञापत्र सादर करून भूमिका स्पष्ट केली आहे.केवळ रेल्वेचा फ्लॅटफॉर्म व लोकल ट्रेनच्या फूटबोर्डमधील अंतर यामुळे रेल्वे अपघात होत नाहीत, तर रेल्वे रूळ ओलांडण्याचे प्रमाण, लोकलमधील गर्दी आदी अनेक कारणांबरोबरच मुंबईतील लोकल वाहतूक सेवा व लांब पल्ल्याच्या गाड्यांसाठी एकच रूळ असल्याने दोन्ही वाहतुकीसाठी एकाच रुळाचा वापर होतो. तसेच लांब पल्ल्याच्या गाड्यांचा फूटबोर्ड व प्लॅटफॉर्म यांच्यातील अंतर अधिक आहे. हे लक्षात घेऊन प्लॅटफॉर्म बांधण्याची गरज असल्याचेही या प्रतिज्ञापत्रात नमूद केले आहे. या याचिकेवर गुरुवारी सुनावणी होण्याची शक्यता आहे.