मुंबई JPN NEWS - महसूल गुप्तचर संचालनालयाने (DRI) न्हावा शेवा बंदरात मोठी कारवाई करत सुमारे ३ कोटी रुपये किमतीचे १० हजार किलो फटाके जप्त केले आहेत. बाटल्या आणि वॉलपेपर असल्याचे घोषित करून आयात केलेल्या मालामध्ये फटाके लपवून आणण्यात आले होते.
DRI अधिकाऱ्यांनी गुप्त माहितीच्या आधारे संशयित कंटेनरची तपासणी केली. या तपासणीत ‘288 Gatling’ प्रकारचे 19,800 फटाके, वजन सुमारे १० हजार किलो असल्याचे आढळून आले. कंटेनरच्या सुरुवातीच्या तीन रांगांमध्ये घोषित केलेला माल ठेवण्यात आला होता, तर त्यामागील बहुतांश कंटेनर फटाक्यांनी भरलेला असल्याचे तपासात समोर आले.
DRI ने फटाक्यांसह घोषित केलेला कव्हर कार्गो सीमाशुल्क कायदा, 1962 अंतर्गत जप्त केला आहे. फटाक्यांची आयात ही परकीय व्यापार धोरणानुसार ‘Restricted’ श्रेणीत असून त्यासाठी DGFT ची वैध परवानगी तसेच Explosives Rules, 2008 अंतर्गत PESO चा आवश्यक परवाना बंधनकारक आहे.
या प्रकरणाच्या तपासादरम्यान बेकायदेशीररीत्या फटाक्यांची क्लिअरन्स करण्याचा प्रयत्न करणाऱ्या सिंडिकेटमधील प्रमुख सदस्याला अटक करण्यात आली आहे. प्रतिबंधित वस्तूंची चुकीची माहिती देऊन व्यावसायिक मालवाहतुकीच्या माध्यमातून तस्करी करण्याच्या प्रकारांवर DRI कडून लक्ष ठेवले जात असल्याचे या कारवाईतून स्पष्ट झाले आहे.
No comments:
Post a Comment